Að kúgast, hósta og snúa höfðinu

Snúningsviðbragðið hjálpar barni að finna vörtuna. Það á að vera til staðar við fæðingu en hverfur við 2 - 4 mánaða aldur þó sumir telji að það vari lengur hjá börnum sem eru á brjósti. Ef snúningsviðbragð er ofurvirkt getur barn truflast auðveldlega og orðið pirrað þegar það á að grípa brjóstið.

Viðbragðið að kúgast ver loftvegi barns fyrir stórum hlutum. Það er örvað mun framar í munni ungbarns en fullorðins. Sumir nýburar kúgast við þrýsting á miðja tungu. Viðbragðið er ofurvirkt í sumum börnum og ef það er stöðugt örvað getur það valdið því að barnið verður fráhverft brjóstinu. Þetta getur verið vandamál ef móðir hefur óvenjulega langar vörtur, ef barnið verður endurtekið fyrir ífarandi aðgerðum, ónærgætnum næringaraðferðum eða ef móðir hefur kröftugt losunarviðbragð. Ef barn byrjar að kúgast við þrýsting á miðja tungu nær það ekki að draga vörtutoppinn að mótum harða og mjúka gómsins. Afleiðingin verður sú að barnið klemmir vörtuna, veldur móðurinni sársauka og nær ekki nægilegri mjólk úr brjóstinu. Vegna þess að þetta er þroskalegt atriði er ekki auðvelt að laga það en einfaldar æfingar gætu hjálpað.  Til að hjálpa barninu að færa að mótum harða og mjúka góms viðbragðið að kúgast er móðir látin setja hreinan fingur með góminn upp (og stuttklipptar neglur) upp í barnið.  Fingurinn er smám saman, á nokkrum dögum, færður innar í munn barnsins til að æfa það í að taka hluti innar í munninn.  Þegar búið er að finna út punktinn þar sem barnið byrjar að kúgast lætur hún fingurinn hvíla rétt áður en þeim punkti er náð. Þegar barnið er búið að sjúga nokkrum sinnum er fingrinum rennt aðeins ofar og svo að gómmótunum. Þegar barnið hefur sætt sig við fingur á eðlilegu dýpi án vandræða er kominn tími til að bjóða brjóstið. Stundum hjálpar að gefa smá mjólk með.  Hóstaviðbragðið verndar barnið fyrir ásvelgingu (aspiration) vökva í loftvegi. Það getur verið vanþroska í fyrirburum og jafnvel sumum fullburða börnum. Hósti í gjöf er venjulega viðbragð við vökva á niðurleið (kyngingarvandamál) en hósti á milli gjafa getur verið viðbragð við vökva á uppleið (bakflæði).

Katrín Edda Magnúsdóttir, ljósmóðir og brjóstagjafaráðgjafi
The breastfeeding atlas. Wilson-Clay/Hoover sec 2002.

Deila