Næturgjafir

Brjóstamjólk er auðmelt og því þurfa flest börn sem eru á brjósti að vakna oftar á nóttunni en börn sem eru á þurrmjólk.  Rannsóknir hafa líka sýnt að þau eru eldri þegar þau fara að sofa alla nóttina.  Samt er vel hægt að hafa  barn á brjósti og fá nægan svefn. 

Næturgjafir þarfnast einskis annars en móður barns og þægilegs staðar til að gefa brjóst á.  Ekkert trítl inn í kalt eldhús eftir pela, engin bið eftir hitun á meðan barnið öskrar.  Það þarf ekki að kveikja ljós og þarf ekki einu sinni að fara fram úr rúminu ef barnið sefur þar.  Það er hægt að gefa næturgjöf án þess að vakna almennilega sem gerir það mun auðveldara að sofna aftur.

Auðveldasti staðurinn fyrir næturgjafir er liggjandi í rúminu.  Þegar barnið hefur gripið vörtuna getur móðirin dottað eða að minnsta kosti hvílst.  Til að skipta um brjóst er hægt að leggja barnið á bringuna og velta yfir á hina hliðina (eða í litlu plássi ýta barninu undir og klifra yfir það).   Þegar barnið er búið að drekka nægju sína getur það sofið áfram við hlið móður sinnar.  Mæður þurfa ekki að hafa áhyggjur af að þær velti sér yfir barnið.  Jafnvel í svefni verða þær varar við barnið. Það ætti þó ekki að láta barnið sofa „uppí“ ef foreldrar reykja, eða eftir neyslu áfengis, fíkniefna eða lyfja sem breyta svefnmynstri.  Ef rúmi er ýtt að vegg er komið í veg fyrir að barn detti út úr rúmi.  Börn ættu ekki að sofa í vatnsrúmi, á koddum eða öðru mjúku undirlagi sem hindrað gæti öndun.  Mæður og börn hafa sofið hlið við hlið frá upphafi mannkyns og slíkur samsvefn gerir öllum í fjölskyldunni kleift að fá nægan svefn. 
Ekki finnst öllum þægilegt að láta börnin sofa „uppí”.  Sumar mæður kjósa hægindastóla fyrir næturgjafi eða ruggustóla.  Þá er gott að hafa teppi og kodda í seilingarfjarlægð.  Það er um að gera að vera sveigjanlegur varðandi skipulag næturgjafa.  Það getur breyst í samræmi við breyttar þarfir einstaklinganna sem að koma.  Börn sem sofa hjá foreldrum venjast á endanum á eigið rúm og þau hætta á endanum að vakna á nóttunni.

Katrín Edda Magnúsdóttir, ljósmóðir og brjóstagjafaráðgjafi.
Heimild:Breastfeeding Pure and Simple, 2000.

Deila