Mjólkurþistill á meðgöngu

28.06.2009

Er eitthvað sem mælir gegn því að taka mjólkurþistil á meðgöngu?


Sæl og blessuð!

Mjólkurþistill hefur verið notaður í yfir 2.000 ár til að meðhöndla vandamál í lifur og gallblöðru. Mjólkurþistill hefur einnig verið notaður til að auka flæði brjóstamjólkur. Samkvæmt þeirri heimild sem ég hef þá hafa verið gerðar 2 litlar rannsóknir á notkun mjólkurþistils á meðgöngu þar sem útkoman var góð en þetta hefur ekki verið staðfest með stærri rannsóknum þannig að notkun hans er ekki talin örugg á meðgöngu og við brjóstagjöf enn sem komið er.

Margir telja að afurðir sem teljast hreinar náttúruafurðir séu með öllu skaðlausar en það er víst langt frá því. Vissulega geta margar náttúruafurðir haft góð áhrif á ákveðin vandamál en á sama tíma getur þessi sama afurð haft slæm áhrif á aðra starfsemi í líkamanum eða komið ójafnvægi á líkamsstarfsemina.  Það er með náttúrulyf eins og önnur lyf að það þarf að vega og meta ávinning af því að taka inn lyfið til móts við þá áhættu sem það getur falið í sér. Mjólkurþistill er yfirleitt notaður þegar um lifrarsjúkdóma er að ræða þannig að ef eitthvað slíkt er að hrjá þig þá er rétt að þú ræðir það við lækni hvort hugsanlega sé ávinningur af því fyrir þig að taka inn Mjólkurþistil.

Gangi þér vel.

Kær kveðja,


Anna Sigríður Vernharðsdóttir,
ljósmóðir og hjúkrunarfræðingur,
28. júní 2009.

Heimild: http://www.mayoclinic.com/health/silymarin/NS_patient-milkthistle