Grænt legvatn og hósti

20.06.2017

Hæhæ. Ég eignaðist son minn í október 2015. Þetta var erfið fæðing og var legvatnið grænt þegar belgurinn var sprengdur. Hann fór á vökudeild eftir að hafa verið tekinn með klukku en var fljótur að ranka við sér og var kominn aftur í fangið til mín 1 og hálfum tíma síðar. Hann hinsvegar hóstaði og kúgaðist mikið fyrsta sólarhringinn og hefur hann hóstað mikið síðan þó svo hann sé ekki kvefaður. Dagmamman talar um þetta og hann hóstar ósjaldan upp mat/ælir enn þann dag í dag við mikil átök. Hann hóstar einnig oft þegar hann hefur hlaupið svolítið. Ég hef verið að velta fyrir mér hvort einhver tengsl gætu verið milli fæðingarinnar (að skítugt legvatn hafi komist í lungun) og þeirri staðreynd að barnið mitt hóstar meira en flest önnur börn? 

Heil og sæl, ég hef hvergi rekist á það að það séu tengslu milli litaðs legvatns og hósta síðar á ævinni. Sérstaklega þar sem hann var mjög fljótur að jafna sig og var kominn til þín fljótt. Að hósta og kúgast á fyrsta sólarhring er frekar algengt hvort sem legvatn er litað eða ekki. Gangi ykkur vel.