Spurt og svarað

31. janúar 2009

Páfagaukar

Langaði að athuga með páfagauka, þar sem við eigum einn og þeir eru taldir vera miklir ofnæmisvaldar. Þurfum við að láta hann fara ? Er komin 8 vikur á leið og vil ekki taka neina áhættu með það. Hef heyrt að ef maður á kött að þá eigi maður helst ekki að vera með svoleiðis á heimilinu eða þá allavegna ekki koma nálægt kattasandinum.

Kveðja, Embla.


Sæl og blessuð!

Við leituðum til Helgu Finnsdóttur, dýralæknis sem sendi okkur eftirfarandi svar:


„Hafi umtalaður heimilispáfagauk ekki valdið ofnæmi hingað til, er harla ótrúlegt að hann geri það úr þessu og því tæpast nokkur ástæða til að láta hann fara. Frekar ætti að hlakka til þess að geta kennt barninu að þykja vænt um gauksa! 

Til er sjúkdómur í fuglum sem kallast á íslenzku  páfagaukaveiki (Psittacosis/avian chlamydiosis) en sjúkdómurinn orsakast af sýklinum Chlamydophila psittaci. Þessi sjúkdómur getur borizt í fólk úr fuglum og veldur þá lungnabólgu. Smit er sennilega algengast hjá þeim sem vinna innan um dýr, s.s. hjá dýralæknum og starfsfólki í gæludýraverzlunum og/eða dýragörðum. Það er afar ósennilegt að venjulegur heimilispáfagaukur sé smitberi, enda tel ég að páfagaukaveiki sé mjög fátíð hér á landi. Upplýsingar um tíðni sjúkdómsins hér á landi er sennilega bezt að  fá hjá Landlæknisembættinu.  

Varðandi gæludýr og meðgöngu er alltaf skynsamlegast að viðhafa fyllsta hreinlæti!“

Við þökkum Helgu fyrir svarið og vonum að það gagnist vel.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
31. janúar 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.