Ljósmóðir.is notar vafrakökur til að bæta notendaupplifun og stuðla að frekari þróun heimasíðunnar.
Upplýsingar um vafrakökur
06. mars 2018
Takk fyrir frábærann vef! Ég á 11 vikna dóttur sem hefur þyngst lítið frá fæðingu. Hún byrjaði að fá ábót öðru hvoru og svo pela á kvöldinn fyrir nóttina og sefur vel og virtist sátt í upphafi en svo varð hún smátt og smátt pirruð og örg á brjóstinu. Í 9 vikna skoðun var hún dottin niður um kúrvu og ég var eiginlega bara að gefast upp á brjóstagjöfinni. Ég ætlaði að trappa hana niður smátt og smátt en eftir að hún fór að fá pela neitar hún alveg brjóstinu. Hún grætur og snýr sér frá því og gargar þar til hún fær pelann sinn og þá er hún mjög sátt. Eina skiptið sem hún tekur brjóst er á nóttunni og ég er mjög glöð að hún tekur það þá enda rosa þæginlegt að þurfa ekki að fara og græja pela þá, þetta eru 1-2 gjafir. En ég vildi fá að vita hvort það væri einhver leið til að fá hana til að taka aftur brjóst á daginn ef ég næ framleiðslunni upp? Ég sé eitthvað rosalega eftir brjóstagjöfinni og finnst að ég hefði átt að reyna betur og vil gjarnan gera það en hún tekur bara ekki brjóstið.
Heil og sæl, fræðilega séð átt þú að geta náð upp framleiðslunni aftur. Það krefst hins vegar talsverðrar vinnu og þolinmæði. Þú getur dregið úr pelanum og gefið henni brjóst þegar hún er ekki mjög svöng og látið hana totta. Einnig er hægt að nota hjálparbrjóst þá sýgur hún brjóstið jafnframt því að sjúga úr hjálparbrjóstinu svo hún verður þolinmóðari. Svo er líka hægt að fara í mjaltavél og reyna að örva brjóstið þannig til að ná upp framleiðslunni. Að lokum er möguleiki að kaupa þér einn tíma hjá brjóstagjafaráðgjafa til að fá faglegar leiðbeiningar. Gangi þér vel.
Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.
Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.
Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.