Svimaköst og höfuðverkur, komin tæpar 14 vikur

11.01.2008

Sælar og takk fyrir góðan vef.

Ég er komin tæpar 14 vikur og núna síðustu viku hef ég fengið þessi svakalega svimaköst sem geta tekið dálítið langan tíma. Þau koma kannski á 15-30 mínútna fresti í um 2 klukkutíma, hef verið með smá suð og hellu í eyranu og kemur skrítin tilfinning í eyrun þegar sviminn kemur. Svo fór ég að fá hausverki með og alveg dúndrandi, álíka og mígreni (var með það sem krakki) hausverkurinn var í 1 sólahring og hefur verið hausverkjaseyðingur eftir það í nokkra daga. Ég hringdi í ljósmóðurina og í blóðprufunum sem voru teknar um daginn komu allar mjög vel út, fín í járni. Hún benti mér á að þetta gæti verið blóðsykurinn og að ég ætti að passa mig að borða oftar, sem og ég hef gert.

Þá kemur spurningin, þegar þessi svimi kemur fæ ég mér strax að borða, ef þetta væri blóðsykurinn ætti sviminn ekki að hætta strax?

Ef þetta er ekki blóðsykurinn hvað getur þetta verið þá?

Með fyrirfram kveðju og von um skjót svör, Ragga.


Sæl Ragga og takk fyrir að leita til okkar!

Ég er ekki viss um hvað er hér á ferðinni. Getur verið að blóðþrýstingurinn þinn sé of lágur? Getur verið að þú drekkir ekki nægan vökva? Ef þetta heldur áfram þá ættir þú að panta aukaskoðun hjá ljósmóðurinni þinni eða tíma hjá heimilislækni því þetta er ekki eðlilegur fylgikvilli meðgöngunnar.

Kveðja,

Anna Sigríður Vernharðsdóttir,
ljósmóðir og hjúkrunarfræðingur,
11. janúar 2008.