Spurt og svarað

04. apríl 2015

Barmaþroti

Hæ, mig langar að spyrja um þrota á kynfærum. Ég er komin 26 vikur á leið og ég er komin með mikinn bjúg á barmana. Ég hef lesið að það sé ekki óalgengt á meðgöngu en valdi oft óþægindum. Þrotinn hverfur ekki alveg þegar ég ligg útaf, en minnkar eitthvað. Ég er ekki með bjúg á öðrum stöðum á líkamanum. Ég er dugleg að drekka vatn, fer út að labba reglulega (2x á dag) og reyni að hvíla mig þegar ég get. Ég hef nefnt þetta í mæðraskoðun en þetta var ekki athugað nánar. Er eitthvað sem ég get gert til að minnka þrotann? Er eitthvað sem ég þarf að varast? Hvenær fer þetta úr að vera eðlilegt ástand yfir í að teljast óeðlilegt? Með fyrir fram þökk. Kv. Frú S.

 

Heil og sæl frú S. Jú eins og þú segir er þetta frekar algengt og kemur vegna þrýstings á kerfið í kviðnum. Það er ekki mikið sem þú getur gert nema að reyna að sitja sem minnst. Sumum finnst gott að setja kaldann bakstur við. Það er hægt að setja bindi í frysti eða kæli og nota sem kælibakstur. Sumar konur hafa reynt að vera að fjórum fótum, með rassinn hærra til að létta á þrýstingi. Mér finnst mjög hæpið að þetta verði svo mikið að það verði óeðlilegt. Ef að þér finnst þetta vera orðið þannig að þér líst ekki á blikuna skaltu endilega biðja ljósmóðurina þína í mæðravernd að skoða þig og meta þetta. Gangi þér vel.

bestu kveðjur
Áslaug V.
ljósmóðir og hjúkrunarfræðingur
3. apríl 2015
 

 





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.