Spurt og svarað

24. mars 2009

Útreikningur hjá ljósmóður og sónar

Sælar! Kærar þakkir fyrir góðan og hagnýtan vef.

Af hverju er alltaf reiknaður að tíðahringurinn sé 28 dagar til að áætla meðgöngulengd og fæðingardag? Ég hef aldrei verið með þannig tíðahring, minn tíðahringur einskorðast við 21 dag, 23 í mesta lagi, það hefur gerst tvisvar, og blæðingarnar standa yfir í 5 daga hjá mér, hefur aldrei klikkað, en þetta breyttist allt hjá mér eftir að ég átti mitt fyrsta barn, það er að segja þannig að hringurinn er bara 21 dag á milli. Þetta sagði ég ljósmóður minni þegar ég kom í fyrstu skoðun en hún reiknar samt allt út frá því að þetta séu 28 dagar og það var líka gert í sónarnum. Þannig að ég er bara að velta því fyrir mér hvernig þetta hreinlega virki allt saman ég sem hélt ég væri með þetta alveg á hreinu því barnið sem ég geng með var skipulagt og því var allt reiknað út í bak og fyrir upp á egglos að gera.Hvað er málið?

Með þökk fyrir góðan vef og góð svör.


Sæl!

Tíðarhringur hjá langflestum konum er 28 dagar (1. dagur er fyrsti dagur blæðinga og síðasti dagur er síðasti dagur fyrir blæðingar) og egglos oftast á 14 degi frá fyrsta degi blæðinga, þess vegna er meðgöngulengd alltaf reiknuð þannig út. Ef kona fer hins vegar í ómskoðun á fyrstu 20 vikunum er meðgöngulengd reiknuð út frá stærð fóstursins og er væntanlegur fæðingadagur reiknaður við 40 vikur sem er þá 38 vikum frá getnaði, en mæliskekkja er alltaf +/- 5 dagar. Þessar mælingar er langoftast í samræmi við síðustu tíðir hjá konum sem eru með reglulegan tíðarhring á 28 daga fresti.

Kveðja,

María Jóna Hreinsdóttir,
ljósmóðir - deildarstjóri fósturgreinardeildar LSH,
24. mars 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.