Spurt og svarað

27. apríl 2007

Víkkun á nýrnaskálum

Sælar og takk fyrir góðan og upplýsandi vef!

Ég var að koma úr 20 vikna sónar og allt kom mjög vel út nema það var stækkun á annarri nýrnahettunni (eða nýranu, veit ekki alveg hvort). Ég á að koma aftur við 32 vikur í sónar til að athuga hvort að þetta hafi gengið til baka. Mér fannst ljósmóðirin sem var að skoða mig ekki skýra þetta nógu vel út. Ég veit ekki hvað þetta þýðir - er þetta vísbending um einhvern sjúkdóm eða hvað? Maður verður nú pínulítið hrædd þegar manni er sagt að koma aftur í sónar seinna og það skiptir mig engu máli þó að þetta sé algengasta ástæðan fyrir því að konur þurfi að koma aftur í sónar (sem hún sagði nokkrum sinnum við mig). Er þetta hættulegt fyrir barnið?

Hvað gerist ef þetta gengur ekki til baka? Eða ef það stækkar meira?

Ein áhyggjufull verðandi móðir.


Sæl!

Væg víkkun á nýrnaskálum er mjög algeng við 20 vikur og er oftast vegna þess að þvagleiðarar eru óþroskaðir og linir og þvag fer til baka í nýrnaskálina. Þegar fóstrið stækkar og þroskast þá hverfur þetta oftast og er horfið við 32-24 vikur. Það eru vinnureglur á deildinni að ef þetta sést við 20 vikur er boðin ný skoðun til eftirlits við 32-24 vikur, ef það sést ennþá þá er barnið ómskoðað eftir fæðingu. Það er afar sjaldgæft að svona lítil víkkun sé vandamál. Ef þessar skýringar duga ekki má biðja um viðtal á Fósturgreiningardeild.

Kær kveðja,

María Hreinsdóttir,
ljósmóðir - deildarstjóri Fósturgreiningardeild LSH,
27. apríl 2007.

 





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.