Spurt og svarað

06. október 2010

Þaratöflur á meðgöngu

Hæ og takk fyrir góðan vef.

Þannig er að ég og maðurinn minn erum búin að vera að reyna að eignast barn í 1 ár. Það hefur tekist þrisvar sinnum en alltaf misst. Ég hef aldri komist lengra en 7 vikur og er búin að missa núna þrisvar sinnum á 9 mánuðum :( Spurningin mín er þessi: Má borða þaratöflur á meðgöngu? Ég er búin að vera að taka þær í ca. 18 mánuði og datt allt í einu í hug hvort að það gætu verið þær sem eru að orsaka fósturlátin.

Kveðja, Valkyrjan.


Sæl Valkyrja!

Leitt að heyra af þessu. Það er mjög ólíklegt að þaratöflur séu orsök fósturlátanna.

Þari er mjög næringarríkur og inniheldur mikið af vítamínum og steinefnum. Þari er talinn vera góður fyrir frjósemi og heilsuna almennt og á að vera sérstaklega góður fyrir barnshafandi konur. Þari á að vera góður fyrir meltinguna, auka orku, fyrirbyggja hægðatregðu, bakverki, blóðleysi, gyllinæð og jafnvel þunglyndi. Svo á þari að vera góður fyrir húð, hár og bein.

Þegar verið er að taka inn vítamín og bætiefni á meðgöngu er rétt að skoða vel innihaldslýsingar því það er almennt ekki mælt með því að taka inn meira en ráðlagða dagsskammta (RDS) af vítamínum og steinefnum á meðgöngu og eina vítamínið sem mælt er með fyrir allar barnshafandi konur er fólínsýra.

Nú þegar þú hefur misst fóstur þrisvar sinnum í röð er líklega kominn tími til að gera rannsóknir til að finna mögulegar ástæður. Þó er rétt að taka það fram að orsök finnst aðeins í um 25-50% tilfella og því er orsök ókunn í 50-75%tilfella. Talið er að erfðafræðileg vandamál séu orsökin í um 13% tilfella af síendurteknum fósturlátum.

Vona að þú þurfir ekki að upplifa fósturlát aftur.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
6. október 2010.

 

 





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.