Spurt og svarað

19. apríl 2011

Þriðja barn og fyrirburar

Sælar elsku ljósmæður!

Ég geng með þriðja barnið mitt. Hin tvö fæddust fullmeðgengin og engir kvillar komu upp við hvoruga meðgöngu. Nú er ég búin að liggja yfir reynslusögunum á LÍF vefnum með tárin í augunum. Þar er hver fyrirburasagan á fætur annarri af konum sem eru að eiga sitt þriðja barn. Það er ekki laust við að það fari um mann. Er algengt að þriðja barn komi fyrir tímann? Hvað veldur? Er ástæða til að taka því enn rólegra á þriðju meðgöngu?


Sæl!

Mesta hættan á fyrirburafæðingu er hjá konum sem ganga með fjölbura, hafa áður fætt fyrirbura eða eru með óeðlilega lögun á legi. Samkvæmt þeim upplýsingum sem þú gefur þá eru þessir áhættuþættir ekki til staðar hjá þér. Nú veit ég ekki hversu langt er síðan þú fæddir síðast en það eykur líka aðeins líkurnar á fyrirburafæðingu ef stutt er á milli barna, þ.e. 6-9 mánuðir frá fæðingu að næstu meðgöngu.

Vona að þú njótir meðgöngunnar og að allt gangi vel.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
19. apríl 2011.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.