Spurt og svarað

14. desember 2006

Að sitja á hækjum sér í fæðingu

Takk fyrir frábæran vef.

Ég er nú ófrísk að barni númer tvö.  Fyrir á ég 4 og ½ árs gamalt barn. Fæðing þess barns gekk ekki eins og best verður á kosið. Ég gekk tæpar tvær vikur fram yfir og þegar kom að fæðingunni gekk allt mjög hægt fyrir sig. Ég var með mikla verki og útvíkkun gekk afar hægt og á endanum var barnið tekið með keisaraskurði enda komin mikil fósturstreita hjá því. Ég er hvött til þess að reyna að fæða barn númer tvö eðlilega og vil gera allt sem ég get til þess að næsta fæðing gangi vel fyrir sig. Ég hef fengið þær upplýsingar að fæðingarstellingin að sitja á hækjum sér geti aukið grindarmálið um allt að 2 cm og vil ég gjarnan prófa þessa stellingu. Hins vegar er ég bæði komin með gillinæð og æðahnúta í spöngina. Er þá þessi stelling ekki æskileg fyrir mig? Eru meiri líkur á að konur rifni illa og fari illa í spönginni noti þær þessa stellingu?

Með bestu kveðju.


Sælar og takk fyrir að leita til okkar!

Það að fæða sitjandi á hækjum sér hefur verið talin mjög góð fæðingastelling, þar sem þyngdarlögmálið vinnur með þér.  Hins vegar krefst þessi aðferð það að konur séu í góðri þjálfun, því það getur verið þreytandi að húka lengi í rembingnum í þessari stellingu. Ekki eru þekktar heimildir fyrir því að þessi stelling fari illa með spöngina, síður en svo. Hins vegar hefur maður séð auknar rifur er konur sitja á stól í rembingnum vegna þess að setan getur minnkað blóðflæði til spangarsvæðisins. 

Vonandi svarar þetta spurningu þinni og afsakaðu hve svarið kemur seint.

Kveðja,

Steina Þórey Ragnarsdóttir,
ljósmóðir og hjúkrunarfræðingur,
14. desember 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.