Fæðing eftir fyrri keisara - að vera í vatni - nýjustu leiðbeiningar

29.09.2008

Okkur hefur borist þörf ábending frá ljósmóður á Fæðingagangi LSH vegna fyrirspurnar um hvort það má vera í baði í fæðingu þegar konan hefur áður farið í keisara.





Var af forvitni að lesa fyrirspurnir á ljosmodir.is og rakst á fæðing eftir fyrri keisara.   Þar stendur að ekki sé konum mögulegt að vera í vatninu á útvíkkunartímabilinu, sem er ekki rétt því við eigum nú á Fæðingagangi LSH "tvo" þráðlausa vatnsmónitora þar sem hægt er að fylgjast með hjartslætti og hríðum allan tímann sem konan er í baðinu.   Hitt er annað mál hvort þær fæða þar ofaní, býst við að það sé metið í hvert sinn og skoðað t.d. hvers vegna var fyrri keisarinn gerður.  Ef allt er eðlilegt á meðgöngunni og sjálfkrafa sótt, tært vatn, eðlileg stærð á barni og allt gengur eðlilega fyrir sig frá upphafi sé ég ekki hvað mælir á móti baðinu á fyrsta stigi með vatnsmónitorinn okkur við hlið.   Það að vera í vatni í fæðingu eftir fyrri keisara er fremur nýtt af nálinni og höfum við því oft samráð við lækni ef konan óskar eftir þessu.  Konan þarf þó að hafa æðalegg í sér en við reynum þá bara að pakka honum inn í plast.

Kv. Kolbrún Jónsdóttir, ljósmóðir

Frábær nýung fyrir þær sem finnst gott að vera í vatni.


Rannveig B. Ragnarsdóttir,
ljósmóðir og hjúkrunarfræðingur.
29. september 2008.