Gangsetning hjá konum sem hafa áður farið í keisara

07.01.2009

Ég er gengin tæpar 38 vikur með barn númer tvö. Fyrra barn kom í neyðarkeisara en stefnan er tekin á að reyna að koma þessu barni í heiminn án þess að skera. Er þó að velta fyrir mér ef ég geng fram yfir er þá gripið til gangsetningar eða er skipulagður keisari? Ljósmóðir í „Ljáðu mér eyra“ hafa talað um áhættur sem fylgja því að gangsetja þegar maður á keisara að baki. Fór allt í einu að velta fyrir mér ef ekkert er að gerast þegar meðgöngulengd er meira en 41 vika hvort þá farið að íhuga að keisara

Takk.


Sæl og blessuð!

Ef þú verður ekki búin að fæða þegar meðgöngulengd er orðin meira en 41 vika ferðu líklega í skoðun til fæðingalæknis sem tekur ákvörðun í samráði við þig um hvort framkalla eigi fæðingu eða gera valkeisara. Á Landspítalanum eru í dag notaðaðar tvær aðferðir til að framkalla fæðingu hjá konum sem hafa áður farið í keisara. Ef leghálsinn er hagstæður (byrjaður að opnast, mýkjast og styttast) er gert belgjarof en ef hann er ekki hagstæður er mögulegt að setja inn legg (þvagleggur af stærri gerðinni) með lítilli blöðru á endanum sem er smám saman dreginn niður og víkkar þannig leghálsinn þannig að belgjarof er mögulegt.

Ég hvet til að ræða þetta betur við þína ljósmóður í mæðraverndinni en vona að þetta svari einhverju.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
7. janúar 2009.