Grindargliðnun og fæðingarmáti

01.09.2006

Kæru ljósur!

Ég hef verið með mikla grindargliðnun síðan snemma á 4 mánuði og hef átt vandamál með bak fyrir meðgönguna. Önnur mjöðmin er hærri en svo lenti ég í bílslysi á 6. mánuði þar sem að bakið varð fyrir miklu höggi. Ljósmóðir mín og sjúkraþjálfari eru mikið að tala um keisaraskurð en segja að ákvörðunin sé mín. Ég var að velta fyrir mér hvort að þá hefði kannski einhver áhrif á grindina eftir fæðingu ef ég myndi fæða eðlilega? Gæti fæðingin verið erfiðari fyrir mig? Er keisari ekki alltaf verri kostur? Takk fyrir frábæran vef.:) Er á 32. viku.

 


 


Sæl og þakka þér fyrir að leita til okkar
 
Þegar konur eru með grindargliðnun  á meðgöngunni eða vandamál í grindinni er mjög gott að nota heitt bað í fæðingunni þar sem vatnið gerir  konuna auðveldara að hreyfa sig.  Einnig getur verið gott að vera á ferðinni á meðan á útvíkkunartímabilinu stendur ef þú hefur ekki kost á að vera í baði, þar sem þessum konum finnst vont að liggja flatar í rúminu.  Það er misjafnt hversu lengi konan er að jafna sig í grindinni eftir meðgönguna óháð því hvaða fæðingaraðferð er notuð.  Flestar konur finna mikinn mun í grindinni fljótlega eftir fæðingu en þær sem eru mjög slæmar eru eitthvað lengur. Keisari er alltaf verri kostur og mundi ég ætla að þú værir lengur að ná þér á allan hátt, líka í grindinni eftir keisara en eðlilega fæðingu.

Vona að þetta hjálpi þér eitthvað og gangi þér sem allra best.

 

Kveðja,

 

Steina Þórey Ragnarsdóttir,
ljósmóðir og hjúkrunarfræðingur,
1. september 2006.