Hvað það þýðir að vera með 1., 2. eða 3. stigs rifu eftir fæðingu?

20.05.2007

Sælar, takk fyrir frábæran vef...

Mig langaði að spyrja hvað það þýðir að vera með 1., 2. eða 3. stigs rifu eftir fæðingu. Hvað eru það mörg spor og hvað gerist í hverju stigi fyrir sig?

Takk, takk kærlega.

 


 

Sæl og blessuð!

Rifur eftir fæðingu eru flokkaðar í fjóra flokka eftir því hve djúpt þær ná.

  • Fyrsta stigs rifa er grynnst og nær aðeins til húðar, t.d. á skapabörmum eða slímhúðar í leggöngum.
  • Annars stigs rifa nær einnig til vöðvalaga, t.d. grindarbotnsvöðva, spangarvöðva eða leggangavöðva.
  • Þriðja stigs rifa nær einnig til þrengivöðva bakraufar (anal sphincter).
  • Fjórða stigs rifa nær einnig til bakraufarslímu eða endaþarmsslímu.

Samkvæmt tölfræðinni þá fá 65-85% kvenna einhverjar rifur í fæðingunni.  Í einni rannsókn þar sem 5404 konum voru í úrtaki kom fram að 14% kvennanna sem voru með heila spöng, 29,9% kvennanna fengu fyrsta stigs rifu, 36,4% fengu annars stigs rifu. Þær konur sem fengu eingöngu rifu á burðarbarma voru 7,9% og 1,3% fengu þriðja - og fjórða stigs rifur.

Það er talið að spangarnudd með olíu geti minnkað líkur á rifum en það er fjallað nánar um það hér í annarri fyrirspurn.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
20. maí 2007.