Spurt og svarað

02. maí 2007

Systkini viðstödd fæðingu á LSH

Sælar verið þið.

Takk fyrir öll fróðlegu svörin sem er hægt að lesa hérna. 

Gætuð þið sagt mér hvort eldri systkini séu velkomin á fæðingardeild Landspítalans eða í Hreiðrið til að vera viðstödd fæðingu?  Ég er að sjálfsögðu að tala um börn sem er búið að undirbúa vel og hafa a.m.k. einn fullorðinn með til að sinna sér að öllu leiti.  Ég veit að í heimafæðingu er þetta vel mögulegt, en leikur forvitni á að heyra hvernig starfsfólk Landspítalans bregst við því að hafa lítil börn viðstödd.

Bestu kveðjur, G.

 


 

Komdu sæl!

Það er afar sjaldgæft að systkini séu viðstödd fæðingar á Landspítalanum og gildir það öðru máli, hvort börn eru viðstödd fæðingu á sínum heimavelli eins og við heimafæðingar eða inni á stofnun í framandi umhverfi þrátt fyrir að hafa umönnunaraðila með sér og vera vel undirbúin. Ég átta mig ekki alveg á, hvaða aldur þú ert að tala um því annars vegar talar þú um eldri systkini og hins vegar lítil börn.
Það hafa einstaka sinnum borist beiðnir um þetta til Landspítalans og hafa þær verið samþykktar í undantekningartilfellum að uppfylltum þessum skilyrðum:

  • Fyrirspurn eða beiðni þarf að hafa borist um þetta því starfsfólk þarf að vita af þessu fyrirfram.
  • Það þarf að vera ákveðinn aðili með barninu, sem sinnir því allan tímann og það þarf að vera vel undirbúið, en allt þetta ferli er algjörlega á ábyrgð hlutaðeigandi aðila.

Samkvæmt yfirljósmóður fæðingardeildar voru þau börn, sem hafa verið viðstödd fæðingu á fæðingardeild Landspítalans um 10-11 ára aldur. Samkvæmt deildarstjóra í Hreiðrinu þyrftu þau að vera um fermingu til að fá leyfi til að vera viðstödd fæðingu þar. Enda þótt fæðing barns sé oftast eðlilegt, yndislegt og jákvætt ferli geta komið upp þær aðstæður að grípa þurfi inn í fæðinguna t.d. með sogklukku eða töng eða ljúka fæðingunni með keisaraskurði. Oft á tíðum reynist það jafnvel fullorðnum einstaklingum erfitt að upplifa slíkar aðstæður, sem ekki má gleymast, þegar verið er að undirbúa og skipuleggja hverjir ættu að vera viðstaddir fæðinguna.

Það eru skiptar skoðanir á þessu, bæði meðal fagfólks og annarra. Þegar um heimafæðingu er að ræða er eldra systkini á sínum heimavelli og getur ráðið að hve miklu leyti það tekur þátt í þessum atburði. Þegar um fæðingu á sjúkrahúsi er að ræða þá eru aðstæður ókunnar og þrátt fyrir að barnið hafi með sér aðila sem sér alfarið um að sinna barninu þá er ekki víst að barnið finni til öryggis við þessar aðstæður.

Gangi ykkur vel.

Kveðja,

Kolbrún Jónsdóttir,
hjúkrunarfræðingur og ljósmóðir,
2. maí 2007.

 





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.