Þverlega - komin 35 vikur

22.06.2010

Sælar og takk fyrir góða síðu;)

Þannig er mál með vexti að ég geng með þriðja barn og er komin 35 vikur og barnið liggur þversum! Hverjar eru líkurnar á að barnið fari í höfuðstöðu? Eru meiri líkur en minni á að ég endi í keisara? Vil helst fæða þetta barn! Hef verið að reyna að lesa um þetta en finn bara bandarískar síður sem segir að ég verði að fara í keisara...

Með fyrirfram þökk um skjót svör;)


Sæl og blessuð!

Eðlileg „lega“ fósturs á þessum tíma meðgöngu kallast langlega sem þýðir að barnið er annað hvort í höfuðstöðu eða sitjandi stöðu. Barn sem ekki er í langlegu, er í þverlegu eða skálegu. Algengasta ástæða þverlegu og skálegu (oft kallað óstabíl lega) eru slakir legvöðvar og slakir kviðvöðvar og því er þetta algengara hjá konum sem hafa gengið með mjög mörg börn - en ástæðurnar geta vissulega verið fleiri, t.d. fyrirsæt fylgja og of mikið legvatn.

Ef fæðing hefst þegar barn liggur þvert eða á ská getur það leitt til þess að öxlin verður leiðandi fósturhluti og það gengur ekki upp. Ef legvatnið fer þegar barnið er í þessari stöðu er líka aukin hætta á naflastrengsframfalli. Ef legvatnið fer og barnið er í þverlegu eða skálegu þá er mikilvægt að leggjast fyrir eða fara á fjóra fætur með rassinn upp í loft og kalla á sjúkrabíl.

Þú ert væntanlega í nánu eftirliti hjá ljósmóður og lækni vegna þessarar stöðu og þau ættu að geta frætt þig um framhaldið. Stundum er reynd ytri vending við þessar aðstæður en oft fer barnið í þverlegu aftur þrátt fyrir að það takist að venda. Stundum er fæðing framkölluð í kjölfarið á ytri vendingu þar sem samdrættir í leginu halda barninu í réttri stöðu. Keisaraskurður er vissulega þrautarlending ef aðrar leiðir ganga ekki.

Nú eru 2 vikur síðan þú sendir þessa fyrirspurn og kannski er barnið komið í langlegu núna en það eru alla vega talsvert góðar líkur á því.

Vona að allt gangi vel hjá þér.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
22. júní 2010.