Spurt og svarað

09. maí 2005

?Túrverkir? við brjóstagjöf

Strákurinn minn er 3 mánaða og er eingöngu á brjósti. Ég byrjaði á blæðingum nýlega en fæ mikla túrverki í hvert sinn sem ég legg hann við brjóstið. Verkirnir eru meira eins og samdráttaverkir en túrverkir. Er þetta alveg eðlilegt og má ég búast við að þetta verði svona áfram á meðan hann er á brjósti?

.....................................................................

Sæl og blessuð!

Já, það er fullkomlega eðlilegt að þú fáir túrverki þegar þú leggur barnið á brjóst og ert á blæðingum. Hormón (oxytósín) sem verkar á sléttu vöðvana kringum mjólkurblöðrurnar veldur því að þær dragast saman og mjólkin spýtist út úr blöðrunum, niður mjólkurgangana og barnið getur náð henni þar. Þetta hormón verkar líka á slétta vöðva legsins þannig að það dregst saman. Það veldur því sem við í daglegu tali köllum túrverki. Konur finna alltaf misvel fyrir þessum verkjum en sumum finnst þeir meira áberandi í brjóstagjöf. Þú getur þó alltaf huggað við það að þeir eru að „vinna gott starf” og heldur stytta blæðingartímann. Þú mátt búast við að finna fyrir þeim á meðan þú ert með barnið á brjósti en mismikið þó. 

Með bestu kveðjum,

Katrín Edda Magnúsdóttir,
ljósmóðir og brjóstagjafaráðgjafi,
9. maí 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.