15 mánaða, síðasta brjóstagjöf

04.10.2009

Sælar kæru ljósmæður!

Og takk fyrir frábæran vef sem hefur reynst mér vel. Nú er svo komið að litlan mín hefur verið á brjósti í 15 mánuði og er ég þakklát fyrir þann tíma. Ég ákvað fyrir þremur mánuðum að fækka gjöfunum og var farið mjög rólega í það. Hún hefur núna fengið kvöld og næturgjafir í 2 mánuði. Fyrir fimm dögum ákvað ég að taka út kvöldgjöfina. Það hefur reynst afar erfitt. Litlan grætur í 2-4 tíma áður en hún lognast útaf og þetta er einstaklega erfitt fyrir fjölskylduna. Við vorum búin að  vinna í því að koma henni í góða rútínu fyrir svefninn og hún var farin að sofa alla nóttina án næturgjafar. Ég gafst til dæmis upp í gær og gaf henni brjóst áður en hún sofnaði. Hvernig get ég gert þetta á jákvæðari hátt fyrir okkur. Við erum gersamlega úrvinda eftir barning kvöldsins.

Með kveðju. Koalamamma.


 

Sæl og blessuð Koalamamma!

Já, þetta getur verið erfiður tími og því sjálfsagt að leita leiða til að gera hann auðveldari. Kannski hefurðu tekið út kvöld og næturgjafir of þétt. Það hljómar í það minnsta eins og þetta barn sé ekki tilbúið að sleppa kvöldgjöf. Þau verða raunverulega tilbúin á ákveðnum tíma til að sleppa gjöfum. Haltu gjöfinni inni áfram í 2-3 vikur og prófaðu þá aftur.

Gangi þér vel.
Katrín Edda Magnúsdóttir,
ljósmóðir og brjóstagjafaráðgjafi,
4.október 2009.