Áfengisneysla og brjóstagjöf

20.10.2005

Sæl og takk fyrir frábæran vef!

Ég las inn á doktor.is eins og hjá ykkur að það sé í lagi að gefa barni brjóst eftir að hafa drukkið áfengi því að áfengi fer úr mjólkinni en auðvitað ekki á meðan að móðirin er undir áhrifum áfengis. En svo stóð aðeins aftar í fyrirspurninni að konur sem að neyta áfengis reglulega jafnvel bara einn bjór eigi í hættu með að börnin séu með minni hreyfiþroska mér finnst þetta svo skrýtið að einn bjór með mat og gefa svo aðeins seinna að það sé ekki í lagi. Eitt rauðvínsglas drukkið á klukkutíma jafnvel 2. til 3. í viku að það sé ekki í lagi og gefa svo ekki fyrr jafnvel tveim þrem tímum seinna?

Með fyrirfram þökk.

...........................................................................

Sæl og blessuð!

Það er alltaf æskilegast að drekka sem minnst af áfengi á meðan barn er á brjósti. Það er þó allt í lagi stöku sinnum við sérstök tækifæri eins og þú hefur greinilega lesið um. Þessi neðanmálsgrein sem þú virðist vera að tala um vísar til þeirra sem finnst freistandi að hafa þetta meira en góðu hófu gegnir eða eru í byrjandi vandræðum með sína drykkju. Þær sækja frekar í að geta drukkið eitthvað á hverjum degi og eiga jafnvel erfitt með að sleppa úr degi. Það sem verið er að segja er að slík stöðug drykkja geti haft slæm áhrif á börnin þótt ekki sé um mikið magn að ræða í hvert skipti. Þetta eru alltaf túlkunaratriði hvað er mikið og hvað of mikið, hvað er oft og hvað er of oft. Þess vegna er verið að reyna að gefa einhvar viðmið.

Með bestu ósk um gott gengi,

Katrín Edda Magnúsdóttir,
ljósmóðir og brjóstagjafaráðgjafi,
20. október 2005.