Spurt og svarað

26. júní 2009

Áhrif lyfja á brjóstagjöf

Sælar og þúsund þakkir fyrir frábæran og fræðandi vef!

Mig langar að vita hvert er best að leita varðandi áhrif lyfja á brjóstamjólk og hvort lyf séu ráðlögð með barn á brjósti. Nú eru margir sem hægt er að ráðfæra sig við en mín reynsla í gegnum árin er sú að sjaldan fær maður sömu svör milli fræðimanna og oft er ekki mælt með lyfjum sem aðrir segja í lagi og öfugt. Nú á ég von á mér eftir nokkra mánuði og tek lyf að staðaldri þegar ég er ekki ófrísk og ég vill helst sleppa við að leita þangað sem vitneskjan er minnst eða jafnvel röng. Þannig að spurning mín er þessi, leitar maður til barnalæknis, hjúkrunarfræðings, ljósmóður,fæðingarlæknis, brjóstgjafarráðgjafa, heimilislæknis eða þess læknis sem skrifar uppá lyfið? Ástæðan fyrir því að ég spyr er sú að svarið hefur stór áhrif á það hvort ég geti verið með börnin á brjósti og vill því vera 100% viss að fá réttu upplýsingarnar.

Kærar þakkir.

 


Sæl og blessuð!

Það er rétt hjá þér að það er stundum auðvelt að fá mismunandi svör við sömu spurningunni. Allir þeir aðilar sem þú telur upp hafa góða grunnþekkingu á lyfjum en eru samt misvel að sér þegar kemur að lyfjagjöf í brjóstagjöf. Um hana gilda nefnilega sérstakar reglur sem eiga ekki við almennt. Hér áður fyrr var sett blátt bann við flest lyf í brjóstagjöf en með rannsóknum hefur komið í ljós að taka flestra lyfja er í lagi. Svo eru stöðugt að koma fram upplýsingar um fleiri og fleiri lyf sem eru samrýmanleg brjóstagjöf. Til hvers sem þú leitar er mikilvægt að viðkomandi afli sér upplýsinga um viðkomandi lyf í lyfjabókum sem fjalla sérstaklega um brjóstagjöf en ekki í almennum lyfjabókum. Til þessa eru allir færir sem þú nefndir en af því þú spyrð svona beint vil ég nefna lyfjafræðinga eða brjóstagjafaráðgjafa.

Gangi þér vel.
Katrín Edda Magnúsdóttir,
ljósmóðir og brjóstagjafaráðgjafi,
26. júní 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.