Spurt og svarað

18. maí 2014

Að endurvekja mjólkurframleiðslu

Sælar og takk fyrir góðan og fræðandi vef!

Ég hef verið að velta fyrir mér hvort hægt sé að endurvekja mjólkuframleiðslu. Þannig er að ég á von á barni í sumar sem konan mín gengur með. Sjálf gekk ég með fyrra barnið okkar og þegar næsta barn fæðist verður eitt og hálft ár síðan ég hætti með eldra barnið á brjósti. Enn get ég kreist dropa úr brjóstunum (veit þó ekki hvort það séu afgangar eða hvað) og langar mig að forvitnast hvort fræðilega væri hægt að ná aftur upp mjólkurframleiðslunni?

Bestu kveðjur.


Sæl og blessuð!

Það er alltaf hægt að endurvekja mjólkurframleiðslu sem hefur einu sinni verið sett af stað. Það þarf þó talsverða vinnu og þolinmæði til. Þegar þú kreistir fram dropa úr brjóstunum ertu í rauninni að viðhalda örlítilli framleiðslu. Það eru ekki afgangar eins og þú orðar það, heldur framleiðir líkaminn alltaf í stað þess sem er tekið. Aðferðin er því sú sama. Þú eykur bara þessa kreistun markvisst og þá sérðu að magnið eykst smátt og smátt dag frá degi. Til að ná upp nothæfu magni getur þetta tekið margar vikur en því duglegri sem þú ert við að örva, því betur gengur það. En eins og ég sagði, þolinmæði er aðalatriðið.

Gangi ykkur vel.
Katrín Edda Magnúsdóttir,
ljósmóðir og brjóstagjafaráðgjafi,
18. maí 2014.






Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.