Spurt og svarað

06. október 2010

Aðskilnaður eftir fæðingu og brjóstagjöf

Sælar og takk fyrir frábæran vef!

Ég er komin tæpar 40 vikur með annað barn og ætla mér að hafa það á brjósti. En þannig er að brjóstagjöf fyrsta barnsins gekk brösuglega og entist ekki nema í tæpa 2 mánuði. Ég og ljósan mín erum búin að fara yfir það ferli og stefnum að sigri núna :) Í fyrri fæðingu upplifði ég færibandavinnu á fæðingadeildinni og vil ekki gera það aftur. Samkvæmt öllu sem ég hef lesið þ.á.m. á þessari netsíðu er æskilegast að leyfa barninu að ná til brjóstsins á sínum hraða og geyma mælingar og annað. Nú upplifði ég þetta þannig að það liggur á að klára þessa fæðingu svo næsta komist að! Svo nú spyr ég: Hef ég ekki rétt á að stjórna þessu ferli sjálf?

„Stuttur aðskilnaður móður og barns á fyrsta klukkutímanum eftir fæðingu getur haft truflandi áhrif á samband móður og barns, fyrstu brjóstagjöfina og lengd brjóstagjafarinnar í heild. Þess vegna er ekki æskilegt að trufla tengslamyndun móður og barn með því að taka barnið úr fangi móður sinnar þegar það er að byrja að skríða í átt að geirvörtunni. Betra er að bíða í 1-2 klukkustundir með hefðbundnar mælingar, baða og klæða barnið, því það getur truflað ósjálfráða hegðun nýburans. Þess í stað er gott að móður og barn að njóti þess að vera saman. Þetta sýnir hversu mikilvægt það er að gefa nýbura og móður góðan tíma til að byrja brjóstagjöfina á farsælan hátt og fjölskyldan eigi þessa mikilvægu stund út af fyrir sig.“

Kær kveðja, Margrét.


Sæl Margrét!

Það er leiðinlegt að heyra að þú hafir upplifað færibandavinnubrögð á fæðingardeildinni. Ég starfa þar og veit að ljósmæður eru yfirleitt ekki að flýta sér að vigta og mæla börnin heldur leggja áherslu á að barnið sé sem mest í fangi móður og taki brjóst fljótlega eftir fæðinguna ef mögulegt er. Ef þú upplifir þetta aftur þá bara biður þú um að fá að hafa barnið lengur í fanginu og spyrð hvort ekki megi bíða með vigtun, mælingar og skoðun. Þú hefur fullan rétt á að stjórna þessu sjálf.

Með von um ljúfa fæðingu og betri upplifun.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
6. október 2010.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.