Spurt og svarað

05. apríl 2006

Barn á brjósti og annað á leiðinni

Sælar!

Mig langar til að spyrja um það hversu lengi fram á meðgönguna er í lagi að hafa eldra barn á brjósti? Fer það bara eftir því hvernig meðgangan gengur eða þurfa brjóstin langa hvíld á milli? Sonur minn er um 11 mánaða núna og er á brjósti tvisvar til þrisvar á sólahring og það gengur vel. Mig langar ekki til að hætta alveg að gefa honum brjóst strax.  Von er á næsta kríli um miðjan nóvember.

Kveðja, krílamamma.


Sæl og blessuð krílamamma.

Það er allt í lagi fyrir þig að hafa barnið á brjósti alla meðgönguna. Brjóstin þurfa sem sagt enga hvíld. Það er hins vegar meiri hluti barna sem venja sig sjálf af brjósti á meðgöngu eða fljótt eftir fæðingu. Það er aðallega talið tengjast bragðbreytingum sem verða á mjólkinni. Ef þau venja sig ekki af þá er það bara allt í lagi ef mamma vill. Það er vel hægt að hafa 2 börn á brjósti sem eru á misjöfnum aldri og reynsla margra kvenna af því mjög góð. Það er gott fyrir börnin og líka fyrir móðurina bæði andlega og líkamlega. Ég ætti þó að vara þig við að því miður eru fordómar gegn slíku í þjóðfélaginu hjá fólki sem ekki veit mikið um brjóstagjöf og búa sér til ástæður. En reynsla kvenna gegnum árþúsundir sýna að þetta er eðlilegasti hlutur í heimi og vísindarannsóknir hafa sýnt að aðlögun líkamans er frábær að slíkum aðstæðum.

Með bestu stuðningskveðjum,

Katrín Edda Magnúsdóttir,
ljósmóðir og brjóstagjafaráðgjafi,
5. apríl 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.