Spurt og svarað

07. ágúst 2010

Bólur á brjóstunum

Halló og takk fyrir góðan vef!

Mig langar að spyrja ykkur um eitt. Ég á einn dreng sem er að verða 10 ára og síðan á þeirri meðgöngu hef ég verið með bólur á brúnasvæðinu á geirvörtunum. Þetta eru bara eins og fílapenslar sem eru mjög stórir. Þeir eru hvítir og ógeðslegir að sjá. Ég kreisti þetta stundum og það kemur þykkur gröftur en þó hvítur að lit út úr þessu. Þetta eru nokkrir klasar á hvoru brjósti. Grunar að þetta séu stíflaðir fitukirtlar en finnst þetta ógeðslegt. Núna er ég ólétt að barni númer tvö og er mikið að spá hvernig ég á að umgangast þessar bólur. Á ég að þrífa þetta með spritti og svo skola vel með vatni áður en ég legg barnið á brjóst eða þarf ég ekkert að gera í þessu. Á ég að "tæma" bólurnar eða láta gröftinn renna sjálfan úr þeim. Með von um svör.

Ein óörugg.

 


Sæll og blessuð „Ein óörugg“!

Þessar bólur eins og þú nefnir eru fitukirtlar sem hafa mjög sérstakt hlutverk í brjóstagjöf. Þeir sjá um að mýkja og smyrja vörtu og vörtubaug fyrir barnið. Þú hefðir ekki átt að vera kreista þá því þá örvast þeir óeðlilega mikið og stækka. Það sem kemur úr þeim er ekki gröftur en getur þó alveg líkst honum. Miðað við lýsingu eru kirtlarnir ekki stíflaðir eða óeðlilegir því þá fengirðu roða, hita og verki í þá. Nú er um að gera fyrir þig að láta kirtlana alveg í friði fram að næstu brjóstagjöf og leyfa þeim að jafna sig og vinna síðan sína vinnu. Þú átt ekki að þvo sérstaklega eða spritta heldur bara fjarlægja það sem kemur af sjálfu sér úr þeim.

Gangi þér vel.
Katrín Edda Magnúsdóttir,
ljósmóðir og brjóstagjafaráðgjafi,
7. ágúst 2010.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.