Spurt og svarað

18. september 2006

Breyttur svefntími hjá 5 mánaða

Kæru ljósmæður!

Ég á dóttur sem er nýorðin 5 mánaða. Fyrir 2-3 vikum fór hún að vakna örar á nóttunni til að drekka, 3 mánaða svaf hún í 8 tíma allar nætur, en núna er hún að vakna á 2 tíma fresti alla nóttina og drekkur þá alveg helling. Er þetta eðlilegt að þetta gamalt barn er að vakna svona oft? Hvað þýðir þetta? Hún er eingöngu á brjósti og langar mig að halda því þannig aðeins áfram allavega. Er þetta ástand komið til að vera? Er ég að stefna í offramleiðslu með því að gefa henni svona oft?

Bestu kveðjur, Snúllu mamma.


Sæl og blessuð Snúllu mamma.

Það eru 2 möguleikar í stöðunni hjá svo gömlu barni. Stundum koma vaxtarsprettir fram svona. Þá fjölga þau gjöfunum sínum bara á hluta sólarhringsins. Stundum lendir það á nóttunni. Ef svo er ætti ástandið að breytast aftur í fyrra horf eftir nokkra daga án þess að þú gerir neitt. Hinn möguleikinn er að eitthvað hefur breyst í gjafamynstrinu að deginum. Þá fær barnið ekki næga næringu úr daggjöfunum og bætir sér það upp með því að fara að vakna að nóttunni til að drekka. Þér er alveg óhætt að trúa því að barnið þarf næringuna úr þessum gjöfum. Það er ekki að gera þetta að gamni sínu. Þannig að þá þarftu að gera eitthvað til að bæta daggjafirnar. Stundum nægir að bæta gjafirnar stuttu fyrir svefninn. Gefa aukagjöf eða gefa skiptigjöf fyrir svefninn. Það er allavega alveg ljóst að þetta ætti ekki að vera komið til að vera. Nei, það er engin hætta á offramleiðslu. Framleiðslan eykst en það er jú það sem barnið er að kalla eftir. Vona að þetta breytist til batnaðar.      

Kveðja,

Katrín Edda Magnúsdóttir,
ljósmóðir og brjóstagjafaráðgjafi,
18. september 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.