Brjóstagjöf að hluta

10.12.2008

Ég rak augun í þessa staðhæfingu í einu svarinu: "Og þegar talað er um að brjóstagjöf minnki líkur á að barn eða móðir fái hina og þessa sjúkdóma þá er yfirleitt alltaf miðað við að barnið hafi verið eingöngu á brjósti“. Get ég þá alveg eins sleppt því að vera að gefa barninu mínu brjóstamjólk því það fær þurrmjólk líka? Er þá enginn eða mjög takmarkaður ávinningur af því fyrst að þurrmjólk er gefin með?

Kveðja. Ein ringluð.

 


Sæl og blessuð!

   Að sjálfsögðu er alltaf ávinningur af brjóstagjöf. En hann minnkar óneitanlega með lækkandi hlutfalli brjóstamjólkur ef við horfum bara á líkur sjúkdóma. Mesti ávinningurinn er náttúrulega næring barnsins, tengslamyndun og nærvera. Það sem aðallega var átt við í fyrrnefndu svari er að tölfræði varðandi minni líkur er yfirleitt fengin fram varðandi konur sem eingöngu eru með barnið á brjósti. Ég tek fram að það er samt alls ekki algilt.

Þú átt því endilega að halda brjóstagjöfinni áfram eins lengi og þið bæði viljið.

Bestu kveðjur.
Katrín Edda Magnúsdóttir,
ljósmóðir og brjóstagjafaráðgjafi,
10. desember 2008.