Spurt og svarað

18. desember 2006

Brjóstagjöf með þríbura

Komdu sæl!

Ég á þriggja ára barn sem að ég var með á brjósti í 10 mánuði og hann þyngdist um u.þ.b. hálft kg á viku og dafnaði virkilega vel. Nú á ég von á þríburum og hef áhyggjur af því að brjóstagjöfin geti orðið vandamál. Fyrirfram er ég harðákveðin í því að gera allt sem í mínu valdi stendur til að börnin fái eins mikla brjóstamjólk og unnt er og helst af brjóstinu frekar en í pela. En ég mun að sjálfsögðu ekki svelta börnin né heldur ganga fram að sjálfri mér heldur leikur mér forvitni á að vita hvernig þetta gengur almennt og hvort það sé óraunsætt að ætla að maður geti verið með 3 börn á brjósti.

Með fyrirfram þökk, ein spennt og hörð brjóstakona!


Sæl og blessuð og til hamingju með það sem þú átt í vændum!

Þetta verður mikil vinna en því fylgir líka mikil gleði að fá tvíbura eða þríbura.  Með brjóstagjöf hjá þríburum þá getur það alveg gengið að hafa þrjú börn á brjósti en það er mikil vinna. Flestar þríburamæður sem ég hef kynnst undanfarin ár hafa gefið 2 börnum í einu og pabbi eða amma hafa gefið þriðja barninu pela og síðan hafa börnin skipst á að fara á brjóstið - stundum hafa mæðurnar átt mjólkaða móðurmjólk sem gefin er í pelann. Það er um að gera að vera bara bjartsýn og láta reyna á þetta þegar þar að kemur, sérstaklega þegar það gekk svona vel hjá þér með fyrsta barn - þá eru líkurnar meiri að þetta gangi vel. Þetta er stundum kallað brjóstagjafa maraþonið þegar mæður eru með tvíbura og þríbura á brjósti. Lykilatriðið er að þau séu öll á svipuðum tíma á brjósti svo móðirin fái einhverja hvíld á milli gjafa.

Með bestu kveðju og gangi þér vel,

Ingibjörg Eiríksdóttir,
ljósmóðir og brjóstagjafaráðgjafi,
18. desember 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.