Spurt og svarað

08. ágúst 2007

Bólgueyðandi gel Orudis 2,5% á meðgöngu

Ég er komin 23.vikur á leið og mig langar að spyrja hvort það sé hættulegt fyrir fóstrið að bera á sig bólgueyðandi krem sem heitir Orudis 2,5% gel

Málið er það að ég vinn standandi vinnu og í síðustu viku fór ég að finna fyrir svo miklum þrýsting niður í nára. Þegar ég skoðaði þetta nánar þá er ég rosalega bólgin fyrir ofan nára, eins og að barnið allt þarna inni þrýsti á eitthvað svæði sem verður svo aumt. Ég finn mikinn sársauka þegar ég snýti mér og líka þegar ég er búin að standa og labba mikið. Ég hreyfi mig reglulega 3-5 sinnum í viku þannig að blóðflæði og allt það ætti að vera í fínum málum. Er eitthvað sem ég get gert og er í lagi að nota bólgueyðandi krem?

Með fyrir fram þökk.


Sæl og blessuð!

Það er erfitt að meta hvað það er sem nákvæmlega er að hrjá þig en þú skalt ræða þetta við ljósmóðurina þína í næstu skoðun.

Varðandi Orudis gelið þá er ekki ráðlegt að nota það á meðgöngu. Eftirfarandi upplýsingar um gelið er að finna í Sérlyfjaskránni:

Meðganga
Ekki er ljóst hvort áhætta fylgir notkun ketóprófens á fyrstu sex mánuðum meðgöngu. Ketóprófen á því ekki að nota á fyrstu sex mánuðum meðgöngu.
Á síðustu þremur mánuðum meðgöngu geta öll efni sem hemja nýmyndun prostaglandína, þar með talið ketóprófen, valdið hjarta-lungna- og nýrnaskaða hjá fóstrinu.
Á síðustu dögum meðgöngu getur það lengt blæðingartíma bæði hjá móður og barni. Ketóprófen á ekki að nota á síðustu þremur mánuðum meðgöngu.“

Vona að þetta skýri málið eitthvað.

Kær kveðja,

Anna Sigríður Vernharðsdóttir,
ljósmóðir og hjúkrunarfræðingur,
8. ágúst 2007.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.