Spurt og svarað

10. maí 2005

Brjóstagjöf og áfengisneysla

Ég vafra dálítið um netið og var að lesa um brjóstagjöf á Barnalandi um daginn í fyrirspurnum. Þar las ég um brjóstagjöf og áfengi. Ég persónulega hélt og held enn að það sé allt í fína að fá sér eitt léttvínsglas og held að á meðan þú sjálf finnur ekki fyrir neinum einustu áhrifum þá sé allt í hinu góða að gefa brjóstið. Ef þú finnur fyrir áhrifum þá bíður þú með að gefa barninu þínu þangað til þau líða hjá. Það á aldrei að mjólka sig og henda mjólk, eða er það? Ég las að það mætti alls ekki drekka og gefa brjóst og maður þyrfti að mjólka sig og henda mjólkinni í sólahring á eftir! Og veistu, þetta halda alveg rosalega margir. Skjátlast mér kannski?

Kær kveðja.

.....................................................................

Sæl!

Það rétt hjá þér að áfengi í mjólk tengist áhrifum sem finnast. Magnið er svipað í mjólk og í blóðinu á hverjum tíma. Og þótt maður vilji náttúrlega aldrei hvetja til áfengisdrykkju við brjóstagjöf þá er fáránlegt að loka augunum fyrir staðreyndum. Það er fullt af konum sem fá sér glas og glas við hátíðleg tækifæri og það er ekki heimsendir. Þótt konur séu með barn á brjósti eiga þær ekki að lifa eins og dýrlingar og umbylta öllu lífi sínu. Þær eiga að reyna að lifa eins venjulegu lífi og hægt er með kostum þess og göllum. Og það er líka rétt hjá þér maður á aldrei að mjólka og henda mjólk nema í henni séu beinlínis stórskaðleg efni. Það eru til dæmi um það eins og t.d. sterkustu krabbameinslyfin, geislavirk efni, flest eiturlyf o.fl. En hjá flestum konum er það í algjörum undantekningartilfellum sem slíkt kemur til.  Við höfum áður svarað svipaðri fyrirspurn um áfengi og brjóstagjöf og þú getur einnig skoðað það svar.

Með kveðju og von um að svörin nýtist,

Katrín Edda Magnúsdóttir,
ljósmóðir og brjóstagjafaráðgjafi,
10. maí 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.