Spurt og svarað

08. maí 2008

Brjóstagjöf og megrun

Ég er með fyrirspurn í sambandi við brjóstagjöf og megrun. Ég er með 15 mánaða gamlan strák á brjósti og það er mjög mismunandi hvenær ég er að gefa honum að drekka. Rútínan hefur samt verið sú að ég er að gefa honum þegar ég kem heim úr vinnunni áður en hann fer að sofa og svo í morgunsárið. Þetta breytist svo eftir aðstæðum, meira þegar hann er veikur, öðruvísi um helgar stundum meira og stundum minna bara svona eftir því hvað hentar hverju sinni. Nú er ég farin að huga að því að taka mig virkilega á og reyna að losna við aukakílóin sem ég hlóð á mig á meðgöngunni. Ég hef verið að skoða einhverja svona kúra eins og Herbalife og þessháttar. Er eitthvað athugavert við að fara á þess háttar kúr þegar maður er með barn á brjósti. Eins er ég að spá í svokallaðar brennslutöflur, eru einhver sérstök efni sem þarf að varast eða eru þessar töflur kannski á algjörum bannlista.

Með von um svör, Bolla.


Sæl og blessuð Bolla.

Það er í sjálfu sér ekkert athugavert við að reyna að léttast þegar maður er með svo gamalt barn á brjósti. Þetta er líka orðin það lítil brjóstagjöf hjá þér. Það er þó alltaf skynsamlegt að fara tiltölulega hægt í sakirnar í þessum efnum og harðir kúrar geta verið varasamir. Herbalife ætti að vera í lagi og varðandi brennslutöflurnar þá eru þær mismunandi. Vertu bara viss um að þú lesir leiðbeiningarnar vandlega áður en þú byrjar og sért sátt við allt sem fram kemur. Svo er gott að hafa í huga að áframhaldandi brjóstagjöf hjálpar þér að halda þyngdinni niðri þótt hún sé orðin þetta lítil.

Gangi þér vel.            

Kær kveðja,

Katrín Edda Magnúsdóttir,
ljósmóðir og brjóstagjafaráðgjafi,
8. maí 2008.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.