Spurt og svarað

02. mars 2004

Brjóstagjöf sem getnaðarvörn

Góðan daginn!

Mig langaði að spyrjast fyrir um tengsl frjósemi og brjóstagjafar.  Nú veit ég að brjóstagjöf er alls ekki „örugg“ getnaðarvörn, enda er það ekki málið hjá mér.  Mig langaði hinsvegar að spyrja hvort áframhaldandi brjóstagjöf (barnið er eins og hálfs árs gamalt).  Tekið skal fram að brjóstagjöf er minnkandi, helst í kringum svefn.  Getur þessi brjóstagjöf ásamt aldri (móðirin er 40 ára) haft einhver áhrif á að þungun eigi sér síður stað? 

.............................................................................

Mig langar að byrja á því að fjalla um brjóstagjöf sem getnaðarvörn áður en ég kem að svarinu til þín.  Brjóstagjöf er nefnilega mjög vanmetin sem getnaðarvörn en samkvæmt rannsóknum getur brjóstagjöf nefnilega verið 98-100% örugg getnaðarvörn!  Til þess að hægt sé að reikna með þessu öryggi þarf að uppfylla þrjú skilyrði:

  • Tíðablæðingar er ekki byrjaðar á ný (blæðingar á fyrstu 8 vikunum eru ekki taldar vera tíðablæðingar).
  • Barnið fær ekki reglulega ábót og ekki líða meira en 4 tímar á milli gjafa á daginn eða 6 tímar á nóttunni (barnið er eingöngu eða nær eingöngu á brjósti)
  • Barnið er ekki eldra en 6 mánaða.

Ef eitthvað af þessum skilyrðum er ekki uppfyllt er ekki hægt að treysta á brjóstagjöf sem getnaðarvörn en séu öll skilyrðin uppfyllt er þetta mjög örugg getnaðarvörn.

Þú tekur ekki fram hvort tíðablæðingar hafi byrjað á ný eftir fæðingu.  Ef þú hefur ekki haft tíðablæðingar er ekki líklegt að brjóstagjöfin á þessu stigi sé orsökin fyrir því.  Til þess að þungun geti orðið þarf að verða egglos og tíðablæðingar verða í kjölfarið á egglosi verði ekki þungun.  Svo framarlega sem þú hefur egglos átt þú möguleika á að verða þunguð.  Samkvæmt tölfræðinni eru reyndar minni líkur á þungun eftir því sem parið er eldra en það er bara svo margt annað sem spilar inn í frjósemina.  

Gangi þér vel - kær kveðja,                                                                        

Anna Sigríður Vernharðsdóttir, hjúkrunarfræðingur og ljósmóðir - 2. mars 2004.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.