Spurt og svarað

24. maí 2006

Brjóstaskeljar

Ég vil byrja á að þakka fyrir frábæra síðu, ég hef notað hana mikið það sem af er meðgöngu minni vegna nánast stanslausra veikinda.

Ég hef fengið mikla hjálp frá frænkum sem gengið hafa í gegnum þetta sama og ein gaf mér danskar skeljar sem eiga að hjálpa ef maður fær stálma. Þær virka þannig að maður á að sjóða þær fyrst og kæla svo. Þær eru svo lagðar á geirvörturnar og smá mjólk kreist fram og svona á þetta að liggja einhverja stund.

Mig langar að vita hvort þetta séu einhver þekkt vísindi eða bara enn eitt kellingaráðið' sem maður fær að heyra á þessum tíma?



Sæl og blessuð.

Það er slæmt ef að á þig herja stanslaus veikindi og ég vona að þú fáir hjálp í þeim.

Olnbogaskeljar (úr fjörunni) hafa verið notaðar í mörg ár á Norðurlöndunum við sárum vörtum. Þær eru ekki notaðar við stálma. Það fer misjöfnum sögum af virkninni og það eru mér vitanlega ekki til neinar vísindalegar sannanir fyrir að þær lagi sárar vörtur. Í mínum huga geta þær hlíft sárum vörtum við ertingu frá umhverfi líkt og plastfilma sem við notum gjarnan en ég get ekki séð að það sé gott að láta mjólk liggja á vörtunni.

Vona að þetta svar hjálpi eitthvað.

Kveðjur,

Katrín Edda Magnúsdóttir,
ljósmóðir og brjóstagjafaráðgjafi,
24. maí 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.