Spurt og svarað

14. júlí 2007

Drekkur með lítið opinn munn - o.fl.

Hæ og takk fyrir skemmtilegan vef ;)

Mig vantar smá svör og ákvað að leita hingað fyrst. Málið er að ég á mánaðar gamlan son sem er bara á brjósti. Hann er að þyngjast mjög vel en ég er að spá varðandi sogið hans. Hann er ekki með munninn svona galopinn þegar hann er að drekka heldur frekar lokaðan. Ég er samt ekki með sár og það er ekki vont þegar hann drekkur. Ætti ég að reyna að laga þetta eða skiptir þetta ekki máli? Alveg síðan hann fæddist þá hefur hann opnað munninn frekar lítið. Mun þetta hafa áhrif þegar hann fer að fá tennur?

Annað, ég fer í skóla núna í ágúst og ætla að mjólka mig til að hann fái brjóstamjólk meðan ég er í burtu. Las að það megi safna mjólk í frystinn en það sem ég vildi vita er hvort það sé svo sniðugt. Hef alltaf lesið að mjólkin breytist eftir aldri barnsins. Ef ég mjólka mig í dag og gef honum eftir 1,5 mánuð er þá ekki samsetning mjólkurinnar öðruvísi en hann þarf þá? Er svo ekki sniðugra að fá sér rafmagnspumpu til að ná sem mestu? Er betra að mjólka sig kannski bara alltaf daginn ur fyrir næsta dag. Þetta verður ca 1 gjöf á dag 4 daga vikunnar. Vona að þú skiljir hvað ég er að tala um og takk fyrirfram fyrir svarið.

Kveðja, ungamamman.


Sælar!

Varðandi drenginn - með munninn þegar hann er að drekka - þá er aðalatriðið að hann opni vel muninn þegar hann er að taka geirvörtuna upp í sig, síðan lokar hann/þéttir hann munninum um geirvörtuna - svo ef þú finnur ekkert til þegar hann er að sjúga - þá reikna ég með því að hann sé að taka geirvörtuna rétt. Ég held að þetta hafi ekki áhrif þegar hann tekur tennur.

Jú það er sniðugra að hafa rafmagnspumpu ef mjólka þarf reglulega úr brjóstunum - ég held að það verði nóg að mjólka úr brjóstunum stuttu áður en þú ferð í skólann - ef það er bara ein gjöf á dag sem hann þarf.

Gangi þér vel,

Ingibjörg Eiríksdóttir,
ljósmóðir og hjúkrunarfræðingur,
14. júlí 2007.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.