Spurt og svarað

30. ágúst 2007

Er meiri hætta á að börn fái eyrnabólgur ef þeim er gefið brjóst útafliggjandi?

Góðan daginn og takk fyrir góðan vef.

Mig langar að vita hvort það sé eitthvað til í því að það sé meiri hætta á að börn fái eyrnabólgur ef þeim er gefið útafliggjandi, þ.e.a.s. ef móðirin liggur á hlið í rúminu og lætur barnið liggja í rúminu upp við brjóstið á meðan hún gefur því brjóst. Ég á 3 börn og á von á því fjórða. Öll mín börn hafa fengið brjóstið útafliggjandi á nóttunni og bara eitt þeirra varð „eyrnabarn“. Ég hef oft heyrt þetta með hættuna á eyrnabólgum en veit ekki hvort þetta eru bara einhverjar kerlingabækur eða hvort þetta er staðreynd. Ég er bara að tala um næturgjafirnar þar sem mér finnst óþægilegt að sitja uppi í rúminu á nóttinni þar sem ég er bakveik og finnst ekki gott að finna mér góða stellingu sitjandi í rúminu, og mér finnst of mikið rask að vera að fara fram í stofu um miðjar nætur  til að geta setið í stól við brjóstagjöfina. Ég hef ekki pláss til að vera með góðan stól í svefnherberginu.

Með von um skjót og góð svör. Takk fyrir.


Sæl og blessuð!

Nei, það er ekki talin meiri hætta á eyrnabólgum við útafliggjandi brjóstagjöf ef barnið er eingöngu á brjósti. Það hafa hins vegar rannsóknir sýnt meiri hættu á eyrnabólgum við útafliggjandi pelagjöf ef barn er á þurrmjólk. Það er mjög algengt að fólk rugli þessu saman. Já, þetta er ein af þessum kerlingabókum sem virðist þurfa margar aldir til að losna við eins og að mæður megi ekki borða hitt og þetta í brjóstagjöf, megi ekki verða kalt á brjóstunum, megi ekki fara í leikfimi o.s.frv. Þú tekur eftir að þær miðað alltaf að því að gera mjólkandi mæðrum erfitt fyrir. Konur eiga ekki að þurfa að umturna lífi sínu þótt þær séu með barn á brjósti heldur bara að láta sér líða vel. Vona að þú eigir ánægjulega brjóstagjöf framundan.       

Kær kveðja,

Katrín Edda Magnúsdóttir,
ljósmóðir og brjóstagjafaráðgjafi,
30. ágúst 2007.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.