Spurt og svarað

14. október 2008

Exem á geirvörtum

Sælar, og takk fyrir stórfróðlegan vef.

Ég er með 12 vikna gamla dóttur  mína á brjósti, og segi farir mínar ekki sléttar. Hún hefur drukkið vel og þyngst vel frá fæðingu. Ég virðist hins vegar vera með skelfilega  viðkvæmar geirvörtur, fékk á þær blæðandi sár fyrstu dagana sem tók u.þ.b.  5 vikur að græða. Það blæddi svo mikið að blóðlifrarnar gengu upp úr  barninu, kúkurinn var eins og mekonium fyrstu fimm vikurnar, og vaggan var  iðulega ötuð blóði að innan ef hún gubbaði. Við mæðgurnar sigruðumst á  sárunum með hjálp góðra kvenna, eldhúsfilmu og mömmusalva, og allt hefur  gengið vonum framar undanfarnar sjö vikur. Nú er hins vegar farið að kólna  í veðri, og þá er vandamálið komið upp aftur. Ég fæ alltaf mikið kuldaexem  á haustin, bæði á hendurnar og á varirnar, og nú er eins og exemið hafi  lagst á geirvörturnar. Þær eru bleikar og sárar, upphleyptar og blæðandi,  og ég trúi því eiginlega ekki að ég þurfi að ganga í gegnum þetta  sársaukavíti aftur. Mér skilst að eina leiðin til að græða exemið séu  sterakrem, sem ég vil að sjálfsögðu ekki bjóða dóttur minni upp á. Til að  bæta gráu ofan á svart er eins og dóttir mín sé að hafna brjóstinu, hún  vill alls ekki drekka úr öðru brjóstinu, og slítur sig sífellt öskrandi af  hinu. Undanfarna daga hef ég þurft að mjólka mig og gefa henni þannig -  sem er að vísu kærkomin hvíld fyrir geirvörturnar, en virðist ekki duga  til að græða þær. Ég er eiginlega við það að gefast upp á þessari  vitleysu - er eitthvað hægt að gera annað en að bíta á jaxlinn og blæða  til vors, eða hætta með barnið á brjósti?

Bestu kveðjur.


 

Sæl og blessuð.

Það er mjög slæmt að lenda í svo miklum vandræðum vegna sárra varta því það gerir gjafir mjög sársaukafullar.

Það er í raun ekkert því til fyrirstöðu að nota sterakrem í brjóstagjöf og er eitt af þessum gömlu bannorðum sem eru dottin út. Það þarf að viðhafa vissa varkárni til að koma í veg fyrir að kremið fari í miklu mæli til barnanna. Það er í raun bara gert með því að bera kremið eftir gjöf og láta það vera í friði í 20-30 mínútur. Ef barnið verður að drekka áður en þessi tími er liðinn verður að þvo kremið vandlega af áður, gefa og bera svo á aftur.

Það getur hjálpað með öskurtímann hjá henni að stytta gjafirnar. Ef hún slítur sig af og öskrar þá er gjöf lokið.

Gangi þér vel.   

Kveðja,

Katrín Edda Magnúsdóttir,
ljósmóðir og brjóstagjafaráðgjafi,
14. október 2008.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.