Spurt og svarað

18. september 2006

Fljótari að drekka úr öðru brjóstinu

Hæ og takk fyrir frábæran vef!

Ég er með einn tveggja mánaða sem er eingöngu á brjósti. Síðast liðinn mánuð er hann mjög fljótur að drekka úr öðru brjóstinu en getur verið endalaust á hinu, 5-10 mínútur á öðru og 15-25 mín á hinu.  Hann virðist vera jafn sáttur við bæði brjóstin nema kannski á kvöldin þegar hann drekkur úr brjóstinu sem hann er fljótari. Eins og hann vilji vera lengur á því en er sáttur þegar hann er reistur upp og lagður á teppi. Mín spurning er hvort þetta sé eðlilegt eða er minna í brjóstinu.  Geirvörturnar á mér eru mjög ólíkar og hann hefur þyngst vel.

Kveðja, Hrefna.


Sæl og blessuð Hrefna.

Það getur verið alveg eðlileg líffræðileg skýring á þessu. Það er smávægilegur munur á vídd útfærsluganganna sem liggja í gegnum vörtuna. Þetta truflar svo sem ekkert, sérstaklega ekki ef barnið er eins gott og þitt og fara ekki að taka annað brjóstið fram yfir hitt. Þessi munur getur jafnast út að einhverju leyti með auknum aldri og styrk barnsins. En aðalatriðið er að þetta er ekkert til að hafa áhyggjur af. Á kvöldin geturðu haft það þannig að gefa bara bæði brjóstin. Vona að gangi svona vel áfram.

Kveðja,

Katrín Edda Magnúsdóttir,
ljósmóðir og brjóstagjafaráðgjafi,
18. september 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.