Spurt og svarað

10. október 2009

Geymsluþol þíddrar brjóstamjólkur

Sælar!

Nú hef ég undir höndum blað sem segir að ég megi geyma brjóstamjólk í kæli í 2-3 daga áður en þarf að henda henni. Spurningin mín er sú að ef ég frysti 3 daga gamla brjóstamjólk (má það í fyrsta lagi þegar hún er alveg að "renna út" á tíma?) og þíði hana í ísskáp (sem tekur um 10-12 klst. hjá mér við 4°C) þarf að gefa mjólkina strax og hún er þiðin eða má t.d. nota hana næsta sólarhringinn eftir þíðinguna?

Kærar þakkir.

 


Sæl og blessuð!

Ef þú ert með brjóstamjólk sem þú ert nokkuð viss um að nota á næstu dögum er best að geyma hana í ísskáp við 0-4°C. Hún geymist í 7-8 daga. Ef lengri tími er liðinn verður þú að henda henni.

Ef þú ert ekki viss hvort þarf að nota mjólkina á næstu dögum er betra að frysta hana strax. Þegar þú hefur látið hana þiðna hvort sem er í ísskáp eða á borði þarf að nota hana á næsta sólarhring. Það gildir það sama um mjólk sem hefur ekki farið í frystinn fyrr en eftir nokkra daga.

Þetta gildir um fullburða, hraust börn en ef um veikburða börn er að ræða eru oft notaðar strangari reglur um geymslu. Ég nefni þetta bara af því að það kemur ekki fram hvað þú ert með gamalt barn.

Gangi þér vel.
Katrín Edda Magnúsdóttir,
ljósmóðir og brjóstagjafaráðgjafi,
10. október 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.