Spurt og svarað

26. september 2009

Gos og brjóstagjöf

Takk fyrir frábæran vef! Ég las það hér á vefnum að það væri allt í lagi að drekka gos í brjóstagjöf. Ég byrjaði að drekka gos þegar barnið var 3ja vikna gamalt og þá fór það að reka við með svo hræðilegri lykt. Ég var dálitla stund að átta mig á að þetta tengdist gosinu, en ef ég drekk ekki gos þá hættir lyktin. Þetta er leiðinlegt því ég hef aldrei haft eins mikla goslöngun eins og nú. Ég drakk ekki meira en 2 glös af gosi. Þetta gildir líka um Kristal. Nú þegar ég er hætt að drekka gos segja allir að þeir muni núna að maður megi ekki drekka gos á meðgöngunni, það hafi alltaf verið bannað. Er þetta vandamál þekkt eða er þetta bara einstakt tilfelli? Er eitthvað að þegar það kemur svona hræðilega vond lykt af prumpinu? Þarf ég að sleppa gosi alla brjóstagjöfina, eða er þetta bara smá tímabil (þetta lagist þegar þarmarnir þroskast meira)?

Sæl og blessuð!

Þér er alveg óhætt að drekka gos og hvað annað sem þér dettur í hug. Vond lykt af vindgangi barna er svolítið breytileg frá degi til dags en hún verður aldrei neitt sem kallast góð. Ég veit ekki um hvort bannað sé að drekka gos á meðgöngu. Ég hef aldrei heyrt það. Það er allavega ekki bannað í brjóstagjöf. Gos er bara vökvi með loftbólum.Loftbólur fara ekki í heilu lagi út í blóðið, yfir í mjólkina og þaðan til barnsins. Það er líffræðilega ómögulegt. Kannski tengjast þessar breytingar sem þú finnur fyrir hjá barninu einhverju í gjafamynstrinu. Gangi þér vel.

Katrín Edda Magnúsdóttir 
ljósmóðir og brjóstagjafaráðgjafi 
26. september 2009

Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.