Spurt og svarað

01. mars 2009

Grænar hægðir

Góðan daginn!

Ég sé að það hafa nokkrir sent inn fyrirspurnir um grænar hægðir nýfæddra barna. Sonur minn hefur kúkað grænu nokkrum sinnum og þegar ég spurði út í það í ungbarnaeftirlitinu hér í Svíþjóð fékk ég allt önnur svör en á vefnum. Samkvæmt hjúkrunarkonunni okkar benda grænar hægðir til þess að börnin drekka meira en þau þurfa á að halda og mjólkin renni meira og minna beint í gegnum magann án þess að unnið sé úr henni. Semsagt öfugt við það sem er sagt hér! Mér finnst sú skýring mjög líkleg í okkar tilviki þar sem ég er sjaldan hissa þegar ég sé grænt í bleyjunni. Það er yfirleitt þegar stráksinn hefur hangið á brjóstinu og drukkið yfir sig. Vildi bara benda á þetta án þess að ég viti hvort þetta er algilt. Getur verið gott fyrir mæður sem sjá grænt að vita að kannski eru börnin þeirra alveg að fá nóg af mjólk. Kannski of mikið meira að segja.


 

Sæl og blessuð!

Almenna reglan er sú að litur hægða barna sem eru eingöngu á brjósti skiptir engu máli. Það er sú hugsun sem áhersla er lögð á að sé ríkjandi. Það eimir nefnilega enn af eldgamalli hugsun um að grænar hægðir merki að barn svelti. Þetta er að sjálfsögðu búið að eyðileggja brjóstagjafir ótölulega margra kvenna með fullgóða mjólkurframleiðslu.

Þetta er samt rétt að vissu leyti hjá sænska hjúkrunarfræðingnum. Ofgnótt mjólkur og þá einkum og sér í lagi of hátt hlutfall formjólkur á kostnað eftirmjólkur er líklegri til að valda grænum lit á hægðum. Stöku sinnum getur það farið út í öfgar og þá þarf að laga það.

En þetta gæti kannski verið góð leið til að losna við gömlu mýtuna. Það er spurning. Það er jú búið að reyna ýmislegt annað.

Bestu kveðjur.
Katrín Edda Magnúsdóttir,
ljósmóðir og brjóstagjafaráðgjafi,
1. mars 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.