Spurt og svarað

11. janúar 2008

27 vikur og of lítið barn

Sæl!

Ég og konan vorum að koma úr sónar og fengum þær upplýsingar að tvíburarnir sem við eigum von á eru minni en meðalbörn. Ég hélt að það værin nú bara almennt svoleiðis með tvíbura en læknirinn vildi hitta okkur aftur eftir tvær vikur í stæð fjögurra til þess að fylgjast betur með þessu. Annar tvíburinn er um 10% minni en meðalbarn og hinn um 17% minni. Ég reyndi að spyrja konuna að því hvað þetta þýddi en fékk eiginlega bara það svar að það þyrfti að fylgjast betur með þessu. Getið þið því hjálpað mér og sagt mér hvað þetta þýðir? Eru börnin í hættu, er ástæða til þess að hafa áhyggjur, er eitthvað sem við getum gert til þess að ýta undir þroska/stærð barnanna og hvað ef að það kemur í ljós eftir næstu skoðun að þau eru bara of lítil ennþá, hvað gerist þá?  


Sæl!

Allar vaxtartöflur sem notaðar eru miðast við einbura, ekki eru til vaxtartöflur fyrir tvíbura. Almennt eru tvíburar minni en einburar og meiri  hætta á vaxtarseinkun hjá tvíburum, þess vegna er mælt með meira eftirliti með vexti hjá þeim. Fæðingarþyngd barna er mjög misjöfn og er eðlileg þyngd frá -24% frá meðallagi upp í + 24%. Ef við í sónar mælum börn minni en -18% er ráðlagt að fylgjast með vexti með sónarmælingum, ef börn mælast alltaf  t.d. -18%  og vaxa í þeirri kúrfu þá eru allir ánægðir, þá er vitað barnið vex á sínum hraða . Ef kona reykir þá eru meiri líkur á vaxtarseinkun, hár blóðþrýstingur getur líka haft áhrif og erfðir, ef þessir hlutir eru ekki til staðar þá getur konan gert lítið til að hafa áhrif á vöxt barnanna nema vera í góðri hvíld og lifa heilbrigðu lífi.

Kær kveðja,

María Jóna Hreinsdóttir,
ljósmóðir - deildarstjóri fósturgreinardeildar LSH,
11. janúar 2008.






Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.