Spurt og svarað

05. janúar 2014

Hnútur í brjósti

Fyrir fjórum árum eignaðist ég barn og var með það á brjósti fyrsta mánuðinn. En ég var alltaf að fá sýkingu í annað brjóstið og gafst upp á brjóstagjöf í kjölfarið. Nú er ég ólétt að öðru barni og er með lítinn hnút í sama brjósti. Ég er búin að láta skoða hann og það kom í ljós að þetta var þrútinn kirtilvefur í brjóstinu og ekkert við því að gera. Eðlilega hef ég samt áhyggjur af fyrirhugaðri brjóstagjöf með þennan hnút í brjóstinu. Því langar mig að leita ráða og spyrja hvort það séu til einhver ráð við þessu? Er hægt að losna við hnútinn með einhverjum ráðum svo ég þurfi ekki að vera á sýklalyfjakúrum allt brjóstagjafatímabilið?

Sæl og blessuð!
Nei þú átt ekki að þurfa að hafa áhyggjur af þessum hnút í næstu brjóstagjöf. Líkaminn sér um að hann sé afmarkaður frá framleiðslunni og trufli lítið sem ekkert. Það er töluvert inngrip að losna við svona hnúta og það inngrip myndi trufla brjóstagjöfina miklu meira en að láta hann vera. Þú átt ekki að þurfa á sýklalyfjum að halda í næstu brjóstagjöf nema þú fáir sýkingu í brjóst. Og það forðastu með því að halda vörtunum heilum og tryggja sem best rennsli gegnum brjóstin af mjólk.
Vona að vel gangi í þetta sinn.
Katrín Edda Magnúsdóttir,
ljósmóðir og brjóstagjafaráðgjafi,
5. janúar 2014.




Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.