Spurt og svarað

20. desember 2005

Hrár fiskur og brjóstagjöf

Sælar, og takk kærlega fyrir frábæran og upplýsandi vef.

Nú er farið að styttast í jólin og öll herlegheitin sem þeim fylgja. Ég er gengin 25 vikur og hef grátið það oftar en einu sinni og oftar en tvisvar að ég megi ekki borða grafinn lax og síld (já, grátið í orðsins fyllstu merkingu :) ). Ég ákvað því um daginn að ég myndi bara taka grafinn lax og maríneraða síld með mér upp á fæðingardeild í mars og háma í mig um leið og barnið væri komið í heiminn. En þá vaknar sú spurning, má borða hráan fisk með barn á brjósti? Ég verð kannski bara að bíða þolinmóð fram að næstu jólum.

Kær kveðja, Birna.

............................................................................................

Sæl og blessuð Birna.

Mér þykir leitt að þú skulir missa af öllum herlegheitunum um jólin. Það er svo vinsælt nú á tímum að borða hráan fisk og hrátt kjöt um hátíðar. En góðu fréttirnar eru þær að þú mátt borða þetta allt saman þegar þú ert með barn á brjósti. Þú mátt þó ekki alveg missa þig. Það fá flestir illt í magann af að háma mikið í sig af einni tegund af einhverju. Það er svo aftur annað mál hvort þú hefur lyst á þessu þegar þú ert komin upp á spítala. Hún vill svolítið breytast lystin á þessum vikum. En sem sagt það er allt í lagi.

Bestu jólakveðjur,

Katrín Edda Magnúsdóttir,
ljósmóðir og brjóstagjafaráðgjafi,
20. desember 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.