Spurt og svarað

09. júní 2009

Hvað verður um okkur þegar börnin eldast

Góðan daginn!

Ég er móðir 9 mánaða drengs og hef hingað til leitað á þessa síðu til að fá samkennd, upplýsingar og góð ráð. Nú standa málin þannig að mér finnst eins og ég eigi ekki erindi hingað lengur og veit ekki hvert ég á að leita. Sonur minn er ákveðinn og hefur haldið í mömmubrjóst eins og mestu gersemi lífs síns. Það hefur gengið illa að gefa honum fasta fæðu. Hann tekur þó við tilbúnum grautum en kvölmaturinn, soðnar kartöflur og grænmeti renna misljúflega ofan í hann. Þegar hann borðar illa enda ég með hann á brjósti meira en ég vil. Ég vil fara að minnka þetta. Verst þykir mér að vakna á næturnar því ég les alls staðar að börn eigi að sofa heila nótt á þessum aldri. Hvað á ég að gera og hvar get ég fengið ráð ef ég hef ekki áhuga á því að ónáða hjúkrunarfræðinga heilsugæslunnar á smávandamálum eins og þessu? Er engin síða sem aðstoðar okkur mæður sem erum komnar aðeins lengra í því að koma börnunum okkar á legg? Ég glími við sektarkennd að vilja minnka brjóstagjöf og koma honum skrefinu lengra í "yfirfærsluferlinu".

Bestu kveðjur og þakkir fyrir fyrri aðstoð.

 


Sæl og blessuð!

Það er sjálfsagt rétt hjá þér að vettvangar fyrir konur með „eldri“ börn séu færri en fyrir konur með nýfædd. Það er þó þannig að þessi síða er fyrir allt brjóstagjafaferlið sem getur jú staðið yfir í mörg ár. Og heilsugæslan er fyrir allan aldur þannig að fyrir þeim er þetta ekki endilega smávandamál heldur partur af lífinu og verðugt verkefni.

Börn eru misfljót að fara að borða og það er mikill miskilningur að þau taki til matar síns með mikilli gleði þegar þau fá „leyfi“ til. Meirihlutinn er ekkert sérstaklega spenntur fyrir öðrum mat en brjóstamjólk af ýmsum ástæðum. Aðalatriðið er að leyfa þeim að ráða svolítið ferðinni. Hafa í nágrenni við þau „fingurfæði“. Soðið eða hrátt grænmeti í stykkjum. Ávexti í bitum eða annað sem þú leggur áherslu á. Forvitni þeirra rekur þau yfirleitt til að prófa. Þannig læra þau um bragð og áferð á sínum forsendum.

Það er eðlilegt að þú viljir minnka brjóstagjöfina á þessum tíma en það er erfiður tími til breytinga 8-10 mán. Og næturgjafir eru oft þær sem mæðrum finnast notalegastar og halda í lengst. Þannig að þú þarft ekki að taka hana út nema hún sé að trufla þig eitthvað óeðlilega mikið.

Endilega vertu ekki með sektarkennd. Þið hafið þetta bara eins og ykkur finnst best og látið alla gagnrýni sem vind um eyrun þjóta.

Gangi þér vel.
Katrín Edda Magnúsdóttir,
ljósmóðir og brjóstagjafaráðgjafi,
9. júní 2009.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.