Spurt og svarað

09. janúar 2007

Hvernig er best að haga mjólkun?

Sælar og takk fyrir frábæran vef.

Þannig er mál með vexti að ég átti stúlku í nóvemberlok. Hún tekur brjóst og allt hefur gengið vel. Ég er að fara á námskeið í febrúar einu sinni til tvisvar í viku um kvöldmatarleytið, þá verður hún orðin 13 vikna.  Mig langar að vita hvernig er best að haga mjólkun (ég á Avent handpumpu) og hversu mikið ég á að eiga í gjöf. Hef verið að lesa mér til en upplýsingarnar eru eitthvað misvísandi.

Kærar þakkir.


Sæl og blessuð.

Það getur verið ágætt fyrir þig að vera búin að undirbúa þig svolítið. Þá geturðu átt nokkra skammta tilbúna í frysti. Þú getur mjólkað bæði brjóstin milli tveggja brjóstagjafa einhvern tíma fyrri hluta dags. Ef þú mjólkar þig tvö skipti t.d. með 2-3 daga bili þá ættirðu að eiga í eina gjöf. Það gæti verið á bilinu 100-150 ml (það er svolítið misjafnt hvernig konum gengur að mjólka sig). Ekki láta hugfallast ef þú nærð þessu ekki. Þá ferðu bara 1-2 skipti í viðbót. Þú getur fryst mjólkina í litlum skömmtum.  Sá sem passar svo barnið á meðan þú ert á námskeiðinu getur hitað lítinn skammt og gefið barninu. Ef það vill svo meira má hita annan skammt. Brjóstamjólk er alltaf hituð í vatnsbaði en ekki í örbylgjuofni. Það mætti hins vegar taka hana úr frysti og setja í ísskáp um hádegið þannig að hún væri nokkurn vegin þiðin um kvöldið.

Vona að þetta hjálpi.

Kveðja,

Katrín Edda Magnúsdóttir,
ljósmóðir og brjóstagjafaráðgjafi,
9. janúar 2007.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.