Spurt og svarað

16. janúar 2006

Hvernig heldur maður sem lengst í brjóstamjólkina?

Hæ, hæ!

Nú styttist í mitt fyrsta kríli og ég vara að velta fyrir mér hvernig heldur maður sem lengst í brjóstamjólkina? Mér finnst mjög algengt eða mikið um að konur séu að hætta mjólka 3-4 mánuðum eftir fæðingu.

........................................................................................................

Sæl og blessuð!

Það er spennandi að bíða eftir sínu fyrsta barni og mér finnst mjög jákvætt að þú sért að hugsa um brjóstagjöfina og hvernig þú getir verið sem lengst með barnið á brjósti.

Það er mjög gott að lesa sér til um brjóstagjöfina í bókum og á netinu og fara á foreldrafræðslunámskeið á meðgöngunni. Þegar barnið er fætt, skaltu biðja ljósmóðurina að aðstoða þig við að leggja barnið á brjóst og fylgjast með að barnið taki brjóstið rétt, það skiptir miklu máli fyrir framhaldið. Það er best að leyfa barninu að sjúga brjóstið þegar það vill því að þegar barnið sýgur brjóstið er það líka að framleiða meiri mjólk. Jákvætt hugarfar hefur heilmikið að segja, þ.e. að hafa sjálf trú á að brjóstagjöfin eigi eftir að ganga vel. Fyrstu sólarhringana, þegar brjóstagjöfin er að komast vel á veg, er mikilvægt að fá nægilega hvíld og borða og drekka reglulega og fá einhvern til að hjálpa sér, annaðhvort pabbann eða aðra nákomna, ekki vera feimin við að þiggja hjálp. Þú veltir fyrir þér að algengt sé að konur séu að hætta að mjólka 3-4 mánuðum eftir fæðingu. Stundum er það út af því að farið er að gefa þurrmjólk með, of snemma og oft of mikið, því að mæðrum finnst of mikil binding að vera með barnið eingöngu á brjósti og vilja að aðrir geti gripið inn í að passa barnið. Þá minnkar mjólkurframleiðslan oft mjög hratt og barnið fer að hafna brjóstinu. Það geta verið aðrar ástæður fyrir minnkaðri framleiðslu en þá er mjög gott að leita til fagfólks og fá aðstoð og ráðleggingar.

Gangi þér vel!

Ingibjörg Baldursdóttir,
hjúkrunarfræðingur og brjóstagjafaráðgjafi,
16. janúar 2006.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.