Spurt og svarað

18. desember 2011

Laukur í brjóstagjöf

Ég er með dóttur mína á brjósti. Hún er 3 og hálfs mánaða og er magakveisu barn. Hjúkkan ráðlagði mér að taka út alla mjólkurvöru og passa mig að drekka ekki kók og borða lítið sem ekkert grænmeti. Það er varla neitt sem ég má borða. Þetta er búið að vera rosalega erfitt en  undanfarið hef ég verið að leyfa mér að borða ýmislegt því ég hélt að þetta magavesen væri búið hjá henni. Ég hefði kannski ekki átt að fá mér kjötsúpu því í henni er laukur og mér var sagt að laukur væri eitur í maga á ungabörnum. Degi eftir kjötsúpuátið grét barnið mitt í klukkutíma. Er laukur á bannlista og á ég að hætta leyfa mér að borða hvað sem er?

Ein alveg búin á því.

 


Sæl og blessuð!

Það eru skiptar skoðanir á því hvort mataræði móður hefur áhrif á hegðun brjóstabarna. Brjóstagjafaráðgjafar ráðleggja mjólkandi mæðrum yfirleitt að borða allt sem þær vilja. Sum börn sem koma oftast úr miklum ofnæmis eða óþolsfjölskyldum eru þó greinilega viðkvæmari en önnur. Ef þú ert úr þannig umhverfi getur hjálpað að vanda fæðið og þá sérstaklega að sleppa mjólkurvörum. Að öðru leyti gæti verið ráðlegt að fylgjast með hvort ekki geti verið aðrar ástæður fyrir óværð barnsins. Og sem svar við spurningunni þá er laukur langt frá því að vera á einhverjum bannlista.

Með bestu óskum.
Katrín Edda Magnúsdóttir,
ljósmóðir og brjóstagjafaráðgjafi,
18. desember 2011.

 





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.