Spurt og svarað

09. febrúar 2005

Má ?drýgja? brjóstamjólk með því að blanda hana með soðnu vatni?

Barnið mitt er 8 vikna og er á brjósti. Ég vinn stundum einn klukkutíma í senn tvisvar á dag. Faðirinn annast þá barnið og hann gefur því brjóstamjólk úr pela. Ástæðan fyrir því að hann gefur barninu pela er að það verður stundum óvært og vill mjólk en er ekki endilega mjög svangt því ég gef því vel að drekka áður en ég fer og eftir þörfum þegar ég kem heim. Ég mjólka mig og það er u.þ.b. 45 -60 ml. sem ég næ að mjólka mig í senn. Mín spurning er sú hvort óhætt sé að drýgja mjólkina með soðnu vatni þ.e. blanda hana með soðnu vatni?

.............................................................................


Sæl og blessuð.

Þetta virðist dálítið strembið hjá ykkur að barnið geti ekki verið rólegt í 1 klst. eftir gjöf. Er þá barnið allan sólarhringinn að fá að drekka á innan við 1 klst. fresti. Það er frekar óvenjulegt. Eruð þið búin að velta fyrir ykkur hvort það er söknuður sem veldur óværðinni þegar þú ert farin. Börn geta verið mjög næm á það þegar foreldrar yfirgefa það þótt aðeins um skamman tíma sé að ræða. Ég myndi mæla með að reyna önnur ráð en að bjóða næringu í þennan stutta tíma.
Það er aldrei við hæfi að „drýgja“ mjólk með einu né neinu. Það verður til þess að efnasamsetning og hlutföll brenglast og það er alltaf slæmt. Ef þér finnst koma lítil mjólk við mjaltirnar þá er betra að fara aftur eftir 30 mínútur og fá þá annan skammt í viðbót.

Með bestu óskum,

Katrín Edda Magnúsdóttir,
ljósmóðir og brjóstagjafaráðgjafi,
9. febrúar 2005.





Senda fyrirspurn
Allir reitir verða að vera fylltir útSenda
Fyrirspurnin þín hefur verið send.
Fannstu ekki svar?

Einnig viljum við benda á bæklingaröð Ljósmæðrafélags Íslands og greinarnar "Ljósmóðirin skrifar um", þar er að finna svör við mörgum af algengustu fyrirspurnunum.

Ljósmóðir mun leitast við að svara fyrirspurnum sem fyrst en athugið að það geta liðið allt að tvær vikur frá því að fyrirspurn er send inn og þar til svar er birt hér á vefnum. Svör við fyrirspurnum eru aðeins ætluð til fræðslu og upplýsingar en eiga á engan hátt að koma í stað faglegrar aðstoðar ljósmæðra, lækna eða annars fagfólks.

Því miður getum við ekki svarað öllum fyrirspurnum sem berast en leitumst fyrst og fremst við að svara fyrirspurnum um efni sem ekki hefur verið spurt um áður. Svör við fyrirspurnum birtast hér á síðunni ásamt fyrirspurninni sjálfri.